與舊同事既約會不定期舉行, 總愛回味舊事, 選擇一間唔會限你1.5鐘頭交枱既地方係首要條件! 呢間酒店既露台餐廳自助餐並非第一次食, 晚餐時段由六點至十點, 時間足夠有餘, 可以一邊吹水, 一邊享受美食!
人大了, 對於自助餐既食物要求係重質不重量, 呢度既食物選擇, 如以外間相比, 多多少少會令人失望
食物區係餐廳既入口位置, 方便兩邊客人拎食物, 通常一開始凍海鮮盤係最受歡迎(回本都靠佢), 呢度既凍海鮮盤類包括有:長腳蟹, 翡翠螺, 蚧蚶, 蝦及帶子; 當然唔少得刺身類, 大路如三文魚, 吞拿魚, 赤貝, 鯛魚, 甜蝦都有, 仲有精緻壽司, 款式又算多喎, 一口一件唔怕好快飽!
本應對凍海鮮有D期望, 但長腳蟹肉偏削, 肉質唔鮮甜; 蝦食落口感係得爽口感覺, 一D蝦味都無, 失望.....................
唯有呢款煮鮑魚安慰一下心靈, 口感彈牙, 食到醬汁味道, 食半打無難度!
凍肉區有各式凍切肉, 煙三文魚及煙燻火腿, 配以洋蔥圈或酸青瓜一齊食都幾好味
沙律區有預製或自由配搭, 備有多款醬汁以供選擇, 呢度有款名為Peninsula Dressing, 當然要試啦!
熱盤選擇以西式為主, 有燒牛肉及羊肉作招徠, 仲有約瑟布甸作配菜, 唔係好多地方食到, 羊我就麻麻地, 試左佢既燒牛肉, 肉嫩多汁, 不禁追加!
食到咁上下, 見佢有生果區, 幾款不同新鮮生果, 當然要食返D平衡一下啦, 佢既士多啤梨又甜又大粒, 睇我拎唔少就知好野啦:)
酒店出品既甜品又點可以錯過, 呢度種類都算唔少, 令人目不暇給
佢既蛋糕切得細細件, 唔怕一件已KO你, 估唔到佢既葡撻仔又做得幾出色, 唔太甜但外脆內軟滑
呢客梳芙厘係每人送一客, 即叫即製, 淋上酸味醬汁, 唔膩仲可以有位置食埋佢
包一位咖啡/茶, 仲有精美蝴蝶酥伴食
呢度環境優雅, 燈光柔和, 即使全場爆滿亦唔會有爭食/嘈吵場面, 唯侍應收碟反應略為慢左D, 試過幾次食完出去拎食物返黎, 隻碟仲未收, 呢點要多加注意, 話晒五星級酒店, 當然期望有五星級服務水準啦!
contact me : [email protected]
|
