有日行經呢個商場, 見到呢間銀白色裝修嘅餐廳, 睇下食咩, 原來係韓式餐廳

再望下門口嘅餐牌, 食物選擇有燒烤及其他熟食, 再望下價錢都可以接受, 見有位就入去試下

由於肚餓指數頗高, 先點一客韓式海鮮蔥餅 ($65)作為前菜, 份量唔係太大, 但作為前菜就好合格!

煎至金黃色, 邊位煎到香脆, 餅漿入面有唔少蝦隻, 加埋洋蔥碎, 再點埋特製醬汁, 好味喎!  好快就被清碟!

呢度有除左有特式飲品外, 仲有Juice Bar, 平衡你身體營養!   今晚無飲Juice, 改飲呢杯清新爽口嘅蘋果梳打 ($28), 賣相靚仔, 香甜可口!

燒肉有三款拼盤以供選擇, 由和牛至韓牛都有

見到呢客精選和牛拼盤 ($360), 就知燒肉時間開始, 一客拼盤可以試到4款唔同牛部位, 包括牛舌/牛胸腹/牛小排/牛肋肉, 肉色靚仔, 二人分享份量都岩岩好!

肉到左就開爐, 好快就已經熱, 係時候起動啦..........

首先試左牛舌先, 有一定厚度, 食落口感軟滑中又帶點爽脆, 點少少醬食, 唔錯!
跟住有牛小排, 中間位置帶點脂肪, 食落肉質相當鬆軟, 輕咬幾下已經可以吞落肚
牛肋肉切成一小條, 肉質帶點嚼口, 又另一種口感
牛胸腹脂肪分佈平均, 口感鬆軟, 一塊放晒入口, 肉汁係口內咇出黎, 好滋味!

雖然呢度主打韓式菜式, 但有別主韓菜餐館, 無免費前菜送, 好在佢有呢個咁別緻嘅泡菜金字塔 ($48)

每一層由頂至底係泡菜, 辣蘿蔔及辣青瓜, 三款前菜都夠晒凍, 味道醃得幾好, 用黎伴肉食都好呀!

只食肉始終未夠填包個肚, 叫左呢客豆腐泡菜湯 ($78), 以石鍋上, 夠晒熱辣又能保持熱度

橙紅色湯底夠晒香辣感, 材料除左豆腐外, 仲有蜆, 流心蛋, 泡菜, 翠玉瓜及肉碎, 相當豐富, 叫多碗白飯, 一口湯, 一口飯, 好韓系食法呀.......哈!

呢度侍應夠年青, 反應夠快, 而且抽風系統做得幾好, 食完都唔會沾上一身燒肉味!

Lab 10 : 旺角朗豪坊10樓26號舖

contact me : [email protected]