呢間新開嘅泰菜餐廳，係由呢區返工嘅友人介紹，隻象仔招牌好得意呀

店內面積寬敞，有別於傳統泰菜店裝飾，今晚安排入座卡位，坐得相當舒服

雲石枱面放好了餐具，打開餐牌睇下食咩先

有晚市二人套餐 ($398)，望落菜式岩食，就呢個啦無謂煩惱

小食類價錢吸引，黎個素菜春卷 ($38)見過初面先，一客有4條，有生菜比你包住食

炸至金黃色，入口熱辣辣，外脆內綿，加少少甜辣醬增加味道，包住生菜食可減熱氣

食泰菜又點少得串燒?!  無叫豬/牛/鷄，改為炭燒鷄腎 ($28/2串)

無咩炭燒香味，略嫌燒得未夠乾身，過下口癮尚可!

前菜三選一，酸辣鳯爪勝出

舖係無骨鳯爪上嘅辣椒洋蔥碎，加上酸辣汁，一啖放入口，酸辣味道直達味蕾，滿足感爆燈

友人唔太食得辣，冬蔭公海鮮湯..............不了!  叫個溫和D嘅椰汁鷄湯，用火爐慶住，相當好...........湯還是要熱住飲先好味!

湯料包括鷄肉，菇菌，香芧及辣椒，口感有椰子汁嘅香滑，亦有酸辣味道幾醒胃，無冬蔭公咁刺激!

餐飲就黎杯凍檸茶，解少少辣度之餘又可以清新一下口腔，之後再食.............哈..哈......

主菜出場啦......原隻鹵水豬手，份量超級對眼，多一個人食都無問題，仲有鹵水蛋及芥蘭作配菜

跟多個鹵水汁，食前再淋D係豬手上面
原隻起了骨，真正啖啖肉，豬皮下望見"骨膠原"三個字，入口鬆軟; 肉亦鹵得夠入味，用黎送飯一流呀!

一餐飯有肉類當然都要有菜先飲食均衡，呢客泰式炒雜菜顏色吸引，少少辣幾惹味

澱粉質代表係泰式鮮蝦炒金邊粉，食前先唧D青檸汁再撈均底下嘅花生粒

金邊粉炒至條條分明，甜辣度岩岩好，加左鷄蛋一齊炒多一份蛋香味，又有芽菜增加爽口感，蝦就夠大隻，爽口但無咩蝦味!  趁熱食啦喂!!

呢個二人餐份量夠，味道唔錯，上菜速度快，侍應招呼有禮，回頭率絶對唔低!

泰Thaiology

contact me : [email protected]