睇得多介紹台灣夜市節目，個心就相當掛住當地嘅平民食物，好想去掃街呀.....................未知幾時可以去到台灣，得友人介紹，就去呢間台菜店慰藉一下心靈

無論食物選擇或價錢都相當大眾化，叫多幾款一齊分享都無問題

台式小食選擇，點少得炸鹽酥鷄 ($48)，即叫即炸，熱度十足

未放入口已經聞到炸物香味，外皮相當鬆化，鷄肉一D都唔會被炸乾，鹽酥味相當引人胃口，一舊駁一舊!

供應台式飲品，呢期鳯梨火紅，就要杯鳯梨紅茶 ($28)及荔枝紅茶 ($28)，大大杯夠晒一餐飲，兩杯都充滿香甜果味，甜度適中! 用黎送食物都唔錯!

另一招牌小食係呢客起司肉鬆蛋捲餅 ($40)，無起司款式($39)，加比多$1就有當然要有起司啦

切成四件，夾起時已經有拉絲畫面 (我最期待嘅出現啦.....)，證明幾夠熱度

蛋捲餅夾住肉鬆，增加甜味及口感 ; 起司帶起煙韌作用，相當唔錯，食兩件都相當飽肚!

超歡喜食鴨血，見到餐牌上有麻辣鴨血麵 ($70)，當然要落單啦!  一碗眼見有鴨血，紹菜，蘿蔔鋪面; 湯底加埋炸蒜及豬肉小片，麻幾香，辣味唔算太強，對於想試麻辣嘅人都幾易接受!

鴨血煮得相當入味，滑得黎帶少少煙韌感覺

轉冬粉加$5，口感滑溜又有咬口，用黎配個麻辣湯底係相當之夾，抵加錢嘅!

友人唔食得辣，佢叫咗個手工滷肉飯 ($35/小)，配以紹菜及滷蛋半隻

滷肉選用半肥瘦，醬汁唔會過濃味，用黎送飯岩岩好，食到底都見唔到有油，可以成碗飯食晒無浪費!

下次可以再試其他食物.....................

contact me : [email protected]