呢間有幾十年歷史嘅酒家，由原本地舖搬左上呢個廣場嘅十一樓，升降機門口貼上各演藝明星黎食飯嘅相片，有佢地嘅"加持"，水準靠得住
傳統酒家裝修格局，大魚缸/電視/燒味部/枱上有辣椒醬及花生，有點兒返去細個跟父母去飲茶感覺
肚餓指數高，叫住個小食食住先，呢客沙薑鷄腳 ($48)又點睇呢?!
鷄腳本身唔算太有沙薑味，好在另有碟沙薑加味，想濃想淡味自己話事
太耐無食過紅燒乳鴿啦，呢度有得食仲唔叫返隻($52)咩?!
價錢反映大小，唔算太大隻，隻鴿滷得相當入味，趁熱食點喼汁就係我最愛食法
見到隔離枱實物相當吸引，自己忍唔住都叫脆皮燒鷄 ($118/半隻)
皮薄無咩脂肪，燒得夠香脆，鷄肉唔乾身，點配燒鷄汁仲好味道
呢個薑蔥粉絲魚雲煲 ($108)，價錢相當超值，街市買個魚頭都唔平，呢度仲加埋粉絲同薑蔥煮成一個煲，超級推薦!
魚頭經過油泡處理，變得香脆，一D魚腥味都無，魚雲滑溜，加埋香甜蔥度，千萬唔好留咗佢; 粉絲可以當主食，正!
健康有營之選 - 杞子雲耳浸菜苗 ($88)，少鹽少油，除了雲耳及白菜仔，仲加入芹菜條，偶然食到香甜杞子，黑綠中一點紅!
承傳傳統酒家"美德"，晚飯後會送糖水，呢碗臭草海帶綠豆沙唔係"行貨"呀，少甜充滿臭草嘅香味，熱度十足，如果要比錢食我都OK架!
呢度仲有懷舊菜式，例如蝦多士，懷舊金錢鷄等，價錢大眾化，份量相當對眼，下次可以同長輩黎用味覺黎懷念過去喎!
|
