附近睇完戲又到開飯時間，日本菜從來無抗拒，唔想只食壽司，近近地上黎呢度食日本嘢

晚市套餐主食再跟湯/沙律，仲有餐飲，價錢最貴都係二百頭，親民價

呢份照燒鷄扒定食 ($108)，沙律為蟹子沙律，仲有溏心/溫泉蛋，份量豐富

照燒汁另上，淋上鷄扒上，令鷄肉加添甜甜地味道，鷄皮下無咩脂肪，成件放入口都無問題..........哈哈....

而個汁滲落D飯粒中，就咁單食都好開胃，成個飯食晒無難度

隻溏心蛋入口帶凍感又creamy，同個熱飯相影成趣!

落雨天感覺涼咗，黎個和牛壽喜燒 ($198)就岩晒，先送上GAS爐，再送上壽喜燒，睇下D牛份量多到一個點.......

湯底滾起時就開始聞到壽喜燒汁嘅香味，其餘配料有皇帝菜，豆腐，嗚門卷，金菇菜及鷄蛋

和牛帶點厚度，烚完口感仍然嫩口，索埋D燒汁一齊食，肉汁加甜美燒汁........正呀!

今晚改食烏冬，食到咁上下就加入去煮

一注烏冬"雪雪"聲入口，食晒飽肚又滿足!

餐牌上提供追加小食，點左兩樣一齊開心分享，首先係刺身拼盤 ($88)，四款刺身為三文魚，北寄貝，八爪魚及甜蝦，款式大路

個人較為歡喜甜蝦，蝦肉鮮甜，一啖一隻過下口癮

另一客為厚燒鰻魚玉子 ($38/3件)，放上木魚碎增加"動感"

入口帶暖，香甜玉子中間包住鰻魚，若然鰻魚份量再多D會好D，兩者從來都可以做到好朋友，呢件都唔例外!

餐飲呷口熱咖啡，無投訴!

題外話: 留意到呢度唔少中年侍應，服務態度誠懇有禮，主動留意你需要咩，加茶送碗自動波，讚!

contact me : [email protected]