係呢頭買完波鞋苦惱緊食咩之際，友人提議上去呢度開餐，難得有人有提議，當然答應啦!  未點菜前先食咗個歡迎小食........炸薄脆，點千島汁食，得咗!

早午餐時食唔多夠蔬菜，晚餐時補返，叫客凱撒沙律 ($68)

清脆爽口嘅羅馬生菜，配上香脆煙肉碎及多士粒，面頭再灑上芝士碎，凱撒沙律醬汁另上，落多少隨我喜歡，材料簡單但味道如一!

突然好想食薯條，問過脆燒德國咸豬手會唔會配薯條?!  答案係...........無嘅!  所以就叫左呢客炸薯條配黑松露醬 ($58)

成個鐵筒裝住，脆得黎唔油膩，除黑松露醬外，仲有茄汁!  唔.................我都係投黑松露醬一票!

今晚放棄意粉，改食薄餅，皆因有我歡喜嘅千島海鮮薄餅 ($168)，成個大圓形切成八件

每件都有魷魚，大蝦，蝦仔及八爪魚仔等海鮮，加埋甜椒絲及千島醬，餅底係薄脆，食起黎無咁heavy，咁又可以食多兩件，若然加多D芝士就仲好，其待嘅拉絲場面欠缺!

火焰鷄同德國豬手就多機會食過，呢客火焰脆燒德國咸豬手 ($238)，就係兩者加埋就第一次食，視覺效果夠晒睇頭

火焰幾秒後就熄滅，侍應隨即幫你拎入廚房起肉切件，慳番自己手功.....哈...哈....!

隨豬手送上蜜糖芥末醬及酸椰菜，甜辣醬味道伴隨皮脆豬手一齊食都幾夾，仲可以中和一下皮下嘅骨膠原層!  肉方面夠晒味道，入口唔算太乾身，而且份量都幾足，可供2-3人分享!

呢度除左散叫之外，仲提供晚市套餐，主要係肉食類，下次可以試下!

contact me : [email protected]