都咪話天氣唔會影響用餐選擇，呢輪係咁狂風暴雨，晚上氣溫明顯跌返落二字中，令我想食個火鍋，不期然諗起呢間舖
餐牌上提供8款湯鍋，有辣有唔辣，送白飯/粉絲，另新加酸菜魚鍋 (呢期火紅之物)，全部唔過一百蚊
首先出場係韓國泡菜鍋 ($98)，原爐上，材料之滿形成一個小山丘
材料超級豐富: 包括豚肉，韓國泡菜，娃娃菜，金針菇，鮮冬菇，豆腐，粟米，薯仔片，炸枝竹，餃子，年糕，鳴門卷，仲有紅薯粉及半個公仔麵
豚肉片數量多，用黎點醬油加蒜泥，滋味滿分，鍾意嘅可以用肉片包住白飯再一口食，靈感當然來自韓國飲食節目啦..........哇哈哈!
個湯底愈滾就愈濃泡菜味道，用黎淥公仔麵就絶配，即使好飽都食得落!
再黎日式味增鍋 ($96)，都係一個食物山丘
材料包括: 豚肉，鷄蛋，娃娃菜，金針菇，鮮冬菇，豆腐，粟米，薯仔片，炸枝竹，餃子，鳴門卷，亦有紅薯粉! 湯底帶有味增味道，唔算太濃，同食材都夾到，好岩用黎送飯!
呢次黎個日韓紅白鍋大對決...............結果.........打成平手!
見到除左鍋鍋外，仲有一系列台灣鹽酥小食推介
呢客鹽酥臭豆腐 ($42)，一客八舊整齊排列，灑上調味粉及香蔥
有甜辣醬伴食，入口外皮香口，無半點油膩感，內裏豆腐散發住陣陣臭豆腐獨特香味，食先感受到，咁就唔怕影響到隔離枱客人!
有鍋鍋點可以無凍飲?! 呢度提供台式手調飲品，左邊係荔枝紅玉 ($28)，滿滿荔枝香甜味，又飲到紅茶味; 右邊係純茶王8號 ($30)，茶味香帶點微甜味，解渴之選，份量足夠成餐飲用，抵飲呀!
今晚呢餐超級滿足，仲有儲印章咭送，下次幫襯可以扣減$20，正!
contact me : [email protected]
|
