知道呢間人氣食店係呢頭，今晚行過見到唔駛排隊就梗係要試下

店內面積甚廣，設有上下兩層，無論樓底或空間感十足

開放式水吧及廚房，另一面放滿唔同類型酒瓶，應該係有酒飲啦..........哇哈哈!

店內提供單點或套餐，唔想煩惱，就黎個雙人日式套餐 ($528)

先送上清酒一瓶，係大吟釀，配上兩隻凍清酒杯， 易入口，有米香味，行到熱辣辣，有杯凍酒飲下確係舒服! 

有酒當然要搵D食物送下酒，呢客熱炒魷魚拌明太子醬就及時雨

加入明太子醬炒嘅魷魚，入口軟身得黎帶少少嚼口，唔會過咸，一啖一舊再呷啖清酒，爽呀!

呢客炙烤鮪魚佐芥末蛋黃醬，食過類似嘅煮法係以吞拿魚入饌，今次係三文魚擔旗

厚切三文魚略略炙烤過令邊位帶點硬度，略嫌醬汁多咗D，件三文魚入口係鬆軟嘅!

完成海鮮類，到肉類代表出場 : 京蔥檸檬味豬腩，食前先唧少少檸檬汁

豬腩肉切成薄片，肉身煎得帶點焦香，沾上酸甜醬汁一齊食，肉本身嘅咸香味加上酸甜汁又豐富左整體味道，歡喜佢帶有少少軟骨位，有嚼勁!

另一代表為炸鷄與台式五味醬

即叫即炸，個炸漿超級薄脆，咬入鷄肉會流出肉汁出黎，嫩滑Juicy，配上另一款嘅酸甜汁，點可能唔一舊接一舊?!

茶漬兩碗，分別有三文魚及明太子，入口熱辣辣，夏天日子有D濕飯令人容易人口

每碗仲有溏心蛋，蛋黃夠晒creamy

餐上嘅呢三種小菜，兩款醃菜，一款係醃蘿蔔，與茶漬相當"好朋友"，用黎送飯更加開胃!  而碟涼拌毛豆，用黑椒及蒜蓉代替平時食開就咁搵鹽水烚黎得惹味，呢四盞"紅黃綠燈"，為成個餐加添色彩!

仲有精選甜品，本來對於餐包嘅甜品無咩期望，但呢件伯爵茶芝士蛋糕真係令我地跌晒眼鏡! 

原來每晚甜品由廚師發辦，呢件芝士蛋糕入口相當幼滑，本身已經食到伯爵茶嘅香味，仲有一杯仔伯爵茶醬，當然淋埋上去一齊食，好味到唔駛10分鐘已經被我地KO晒!

坐係落地玻璃側邊位，不時望住途人來往，聽住店內播嘅流行歌曲，享受美食，美酒，現實.......暫且忘記佢，食完呢餐再打拼!

contact me : [email protected]

#jiegenge #food #taiwan #japan #style