上一次黎都未駛等位，今晚黎到要拎飛係門口等一陣，可見網上食評嘅力量
台式麻辣鴨血繼續火紅，自己街買一包入邊都係得幾舊血，呢度嘅麻辣鴨血麵 ($70)，轉冬粉另加$5，鴨血份量有三份一個碗面
鴨血索入麻辣湯嘅味道，濃味又刺激，質感滑身得黎有少少嚼口
喜歡冬粉嘅晶瑩滑溜，加少少麻辣湯底SIR入口中細嚼，特別岩FEEL
主食先上然後到小食出場，講到小食，台式當然頂呱呱，老大哥炸鹽酥鷄 ($48)呢度當然有佢坐陣
鷄件有大有細，外層披上鹽酥粉炸衣，食到內層鷄肉仍然帶有肉汁，熱辣辣一件接一件咁食!
呢5粒就係宜蘭花枝丸 ($38)，外層似係鹽酥系，無類似酸甜醬汁伴食
外層已經夠味道，口感唔算係彈牙果隻，內裏食到花枝嘅碎粒，增加咬口感!
食緊D熱辣辣炸嘢，梗要叫返杯台式凍飲解一解渴，炎熱日子，比較鍾情生果茶系，一黃一綠分別係鳯梨綠茶 ($30)及荔枝紅茶 ($30)，重量級容量，一餐絶對夠飲! 香甜果味兩杯絶對比到我，甜度適中，爽呀!
今晚唔食滷肉飯，轉為試下呢碗牛肉蔥油拌麵 ($56)，牛肉，紹菜及半隻滷水蛋已鋪滿整個碗面，灑上乾蒜及蔥粒，增加香味!
拌麵係刀削麵，將醬油撈均讓每條麵條都沾滿，口感帶點嚼口
牛肉帶點厚度，根據目測及夾起時預知應該係腍身，放入口一咬..............結果一樣，滷得相當入味，肉質腍滑，食得輕鬆!
食物無半點花巧裝飾，賣嘅係味道，正因為咁，今晚入座率爆滿!
contact me : [email protected]
|
