想有大排檔感覺但又怕熱，女子組今晚開餐係呢間搞鬼食店，見到門口對龍鳯就知咩料啦

係大門口望入去，裝修佈置到成條舊屋邨店舖咁，兒時回憶大迴轉，打咭影相獲LIKE應該無咩難度

大圓摺枱及枱面餐具都係大牌檔格局，見到個洗餐具大碗感覺真係返晒黎

食物選擇都唔少，想食大牌檔大路菜式應該實搵到

雖然今晚唔飲酒，但係係佐酒小食類搵到呢碟屋邨三鮮 ($78)，三鮮即係生腸，鷄腎，墨魚

顏色配搭係橙啡橙排列，面頭舖上蔥絲，配以甜醬及芥末

三款食物都係爽口型，凍食配上醬汁同食，有點熟悉嘅感覺，好似食緊附近X姐小食，不過係碟上走串枝，哇哈哈.........!

今晚嘅食物種類分別有魚/肉/菜，均衡飲食嘛

先出場有肉類代表: 青芥沙拉骨 ($108)，擺盤無任何雕花裝飾，肉排上被青芥沙律汁包圍，再灑上芝麻增加香味

肉排有相當厚度，食起黎啖啖肉，青芥辣度係溫和嘅，被沙律醬汁包圍嘅肉質變得幼滑，用黎送飯都唔錯!

呢碟曼谷咸魚炒芥蘭 ($88)，究竟因咩事關曼谷事?  咸魚定芥蘭來自曼谷?  定抑或係曼谷炒法?  無從考究，好味就得啦! 

部份芥蘭係削過皮，食落清甜無渣，混入咸魚碎粒加普寧豆醬一齊炒，咸甜鮮味都有齊!

跟住就到薑蔥頭抽魚雲煲 ($128)上枱，侍應一放低，未食已經聞到香味，大量薑蔥墊底，魚雲份量都唔少

魚雲先炸到香脆，入口完全無魚腥味，頭抽醬汁味道帶點甜味，食到一半熱度仍維持到!  蔥段我都無放過呀，雖然油膩一點但味道香甜!

見網上推介呢碗蛋白杏仁茶 ($28)，當然要試下啦

杏仁味係幾香，食到蛋白，個人覺得甜度多左D，若果想食甜品嘅都可以叫番碗!

contact me : [email protected]