只要識搵，工廈都可以食好西，就好似呢間咁

場內燈光帶點情調，面積唔算大，但枱與枱之間有相當空間，今晚被安排坐於窗口梳化位，感覺舒適

主菜類加$38可轉套餐，有是日餐湯及餐飲，當然加啦!  今晚係忌廉甘荀湯，配以長面包脆條

湯質唔會太杰，食到甘荀味道，飲完都唔會太過飽肚!

飲完熱湯，侍應就送上呢客意大利青橄欖.水牛芝士田園沙律 ($68)。以清爽沙律菜作底部，配上青橄欖，水牛芝士波波，車厘茄及芝士片，淋上香甜黑醋汁，入口全無負擔!

呢客炸薯條.松露醬 ($42)，份量超大份，同價錢唔係幾合正比，除咗松露醬外，仲比埋老拍檔茄汁你

侍應提醒小心熱，炸物當然要熱食好，個松露醬帶點甜味，應該似用沙律醬混松露醬，配薯條比我成碟點晒! 哈哈......

主菜出場，就係照燒美國穀飼牛肩胛 ($168)，擺盤有心思，照燒汁另上

肩胛部係一個經常郁動嘅部位，需要成日走動，仲要支撐整個龐大嘅身體，所以肌肉發達，筋位比較多又肉質結實，肉味豐富。 七成熟上碟，切開仍然見到紅色位，入口肉汁流出，結實又細嫩，脂肪含量低，食得相當健康!

無肉食主食之選，黑松露牛肝菌意大利飯 ($108)

意大利飯索入湯汁味道，咬落有口感，每粒飯粒都比芝士及黑松露醬包圍，入口creamy; 牛肝菌就淡味，清清地無肉主菜!

呢度亦有甜品供應，但肚皮實在變大了，留待下次!

呢杯Mocha只需另加$8就飲到，朱古力甜味配上咖啡香味，當作液體版甜品都唔錯!

contact me : [email protected]