呢間新開嘅小菜館，早午市係可以食點心，晚上就變成中菜館，招牌上寫上仲係試業階段，設有卡位及獨立房間，兩個又或三五知已都岩坐

餐牌上小菜類選擇都不多亦不少，但海鮮類就差唔多變成主角

有湯水嘅晚飯係一件好幸福嘅事，呢度有原盎燉湯，一人一盎，各色其式，望見真材實料，非常有熱度

花旗蔘燉雞 ($48)，見到花旗參片已燉至軟身，入口有參嘅甘甜味，夜訓清熱飲就至岩

海底椰豬展湯 ($48)，滋潤止咳，大路湯水多飲有益

飲完湯就到小食類出場，呢碟沙薑鷄腳 ($68)類似單骨鷄翼斬半，細隻D容易入口。沙薑味唔算太濃，食完都唔會太口渴!

但凡有乳鴿嘅地方我好多時都會叫番隻，睇下呢隻紅燒BB鴿 ($58)，燒得幾咁靚仔!  話明係BB鴿，肉就當然少D，但肉質嫩滑仲有汁，點喼汁食好味呀!

侍應送上呢客胡椒豬肚花蛤煲 ($148)，D湯仲係滾住架，未食已經聞到胡椒嘅香味

先飲啖湯，開初有胡椒香味，但又唔太辣，隨後有酒味，應該加咗酒去配合豬肚同D花蛤; 花蛤一粒沙都食唔到，隻隻都有肉; 豬肚相當有口感，有埋酸菜同粉絲，豐富咗層次同口感!  凍D嘅天氣食應該仲正!

青菜類愛上蒜頭炒蒿荀 ($78)， 蒜頭量絶不手軟，正! 

蒿荀片帶點厚度，炒至爽脆口感，亦有本身嘅清甜味道.......我愛蒿荀!!

最後黎個古法荷葉蒸鷄 ($128)，鷄件以配料紅棗，木耳，杞子被荷葉包住一齊蒸

咁就叫個砵仔白飯 ($15)啦，鷄件有少少荷葉香味，味道調教得唔錯，份量兩個人都差不多，趁熱食啦!

侍應服務週到，主動加茶換骨碟，下次有機會可以食下點心先!

contact me : [email protected]