呢幾條街範圍進駐唔同食店，行下行下發現呢間新開火鍋店，門口有侍應招來

店內有兩層用餐區，望落明亮乾淨

牆上貼住手寫廚師推介煲類，SO港式.....哈哈!

呢個星期終於轉涼，秘製雙冬羊腩煲 (送生菜一碟)/$368亦都上市啦

雙冬即係冬菇及冬荀，加埋馬蹄有助減底燥熱，羊肉份量都幾對眼

羊肉炆得相當入味，唔會過濃味; 皮下無咩脂肪，食得健康，皮仍然帶少少嚼口，肉唔嚡，點D腐乳一齊食，實在係掂檔!  仲可以灼D生菜食減低肉感。

食完滋味羊腩煲後就加湯進入火鍋時間

歡喜食牛嘅友人望住張餐單有D選擇困難症，呢度提供多款唔同部位嘅牛肉(封門柳/牛板腱/本地新鮮牛/牛頸脊)，又有特別嘢食例如黑百栢葉/黃喉/牛骨髓/牛胸油等，最後商議食外國嘢................安格斯牛小排 ($188)!  脂肪比例2:8，肉色吸引，厚薄適合火鍋之作。

放入湯灼至轉色就搞掂，入口感受到油香味，肉質嫩滑無負擔，一啖一片岩岩好!

餐紙寫上丸類及餃類係自家手打，好難唔叫D試下囉

自家手打墨魚丸及鮮蝦丸 ($88)，外觀上都幾粒，加上蟹籽增加卜脆度又靚D

浮起就食得，墨魚丸口感彈牙; 鮮蝦丸就有種札實感覺

自家鮮蝦雲吞及韮菜餃 ($68)，屬於"皇"嘅份量

原隻鮮蝦無切碎，爽口，滿滿豬肉餡調味得唔點醬汁都可以; 而韮菜餃就真係香濃韮菜味，每人兩隻其實都幾飽肚!

火鍋稀客................炸芋頭 ($38)，一客份量都幾多喎

唔駛烚好耐，入口相當粉，芋頭最重要都係呢樣，食完呢客都可以抵銷叫其他澱粉質東西!

員工招呼有禮，坐得舒適，下次可以試下其他鍋底!

contact me : [email protected]

#food #foodie #foodpic #tasty #hkig #foodpics #yummy #港式火鍋 #旺角 #羊腩煲