有時想兩個人食下粵菜，唔要傳統中式酒樓，想坐得舒服寧靜少少，除咗酒店/高級粵菜館，我搵到呢間喎

裝修走摩登路線，設有卡座，昏暗燈光有別於傳統粵菜食店

型格水吧位置，為客人調配特色飲品

紫藍色餐牌及食具，與店名配合

呢度有一人一盎嘅湯羹，各式其色，今晚就叫咗蟹肉酸辣羹 ($98)及陳皮桂魚羹 ($98)，打開蓋見到有煙飄出，夠晒熱，正呀!

酸辣味比較溫和，滿滿蟹肉絲入口鮮甜，代替傳統肉絲，食起黎份外輕鬆，無其他如豬紅，蛋絲及豆腐等配料，係簡單版 !

個桂魚羹材料豐富少少，除咗有桂魚肉，仲有木耳絲，陳皮絲，加幾粒杞子靚晒!  好香魚肉味，個感覺似細個阿媽煲魚粥仔，一D細骨都無，飲完都幾暖胃。

飲完熱湯羹，就到小菜出場，呢碟係燒汁日式牛仔粒 ($128)

一口牛仔粒容易食，肉質帶點嚼口，帶點甜味嘅日式燒汁就算空口食都無問題，加點芝麻就更香口。

愈簡單嘅菜式愈能顯出廚師嘅出品水準，就好似蒜蓉菜心 ($98)，相信大部份人都識炒; 但呢碟有咩唔同呢?!  特色之處係將部份外皮削去，保證你食到嘅係最嫩部分，加上用蒜蓉炒，係簡單呀但又真係好味喎。

壓軸出場係原煲蟹肉炒糯米飯 ($128)，侍應未打開蓋已經知道應該有蝦嘅，蝦香味飄出黎呀......衰鬼!

香味源自蝦乾切碎粒，加入蟹肉芹菜碎，糯米飯口味相當軟滑，又唔係好"糯米飯"嘅口感，每啖飯都食到熱度，呢點相當令我滿意。

侍應招呼殷勤，不時主動加水收碟，份量精緻但味道好岩口味，唔錯唔錯。

#food #foodie #foodpic #tasty #hkig #foodpics #yummy #ublog #dinner #foodblogger  #新派粵菜 #YMT #紫醉軒

contact me : [email protected]