真係好耐冇同大家見面啦~
都係我媽媽懶囉~!
不過爸爸仲懶~搞到冇人幫我打理我個blog........
你地係吾係好掛住我呢??!!
不過吾緊要...我媽媽佢會睇返我咁耐以嚟ge相,
回憶返我啲乖嘢,逐一話返比你地知,
你地吾洗驚會錯過我成長ge一點一滴呀~~
仲有呀~媽媽話喎,我依架大個仔啦~
佢睇返我以前啲相,有好多嘢都有感而發,
想同大家分享下喎~所以,我媽媽會以佢媽媽ge身份同大家見下面,
希望你地都一樣咁鍾意佢啦~~

而今日我去咗公公屋企呀~我好耐都冇見公公啦~
因為公公依架成日都吾喺澳門,就算媽媽帶我返婆婆度,
我都見吾到公公,淨係會見到婆婆同兩個姨姨,
今日公公返咗嚟,佢中午果陣嚟咗我屋企搵我,
我一瞓醒晏覺就見到公公,我好開心呀~
而媽媽又要返工,於是公公就帶咗我返屋企啦~
我今日好乖呀,之不過我打爛咗bb姨姨隻膠杯之嘛~
bb姨姨好嬲呀~不過阿細姨姨幫我認咗罪,bb姨姨入咗阿細姨姨數呀!
好彩~~逃過一劫......
每當bb姨姨大發雷霆果陣,媽媽就會同我講:b仔,巫婆呀~巫婆好恐布呀!!
於是bb姨姨就仲嬲~跟住佢就會尖叫:係呀~巫婆食咗你呀~
我就梗係當佢同我玩啦~我先吾驚巫婆呀~
哈哈!!之後bb姨姨就吾嬲架啦~仲同返我玩添~!
不過今日媽媽吾喺度呀~如果吾係阿細姨姨,吾知個巫婆會點對我呢??
(講吓笑咋,bb姨姨吾好嬲呀!!)
而媽媽知道咗我打爛咗bb姨姨隻膠杯之後,係咁話買過隻比bb姨姨,買個隻比bb姨姨....
媽媽仲話我連膠杯都打得爛~真係曳曳呀~~
媽媽...我咁細個乜都吾識,吾打爛過又點知打得爛喎~
以後吾好話我曳曳啦~~我係你ge乖仔嚟加嘛~
今日玩得都算開心...開心到吾肯返屋企~
爺爺今晚嚟公公度接我果陣我吾肯走呀~仲係咁喊添!!
爺爺:比我玩多一陣得吾得呀??好可惜,爺爺聽吾明我講咩~
唯有喊住咁返屋企啦~~

回憶:2008年7月3日
今日爺爺發現我喺張bb床度瞓到打横咗~
係我第一次打橫瞓呀~爺爺將呢件事話咗比媽媽聽,媽媽將佢記低咗呀~
雖然冇相為証,但係媽媽佢知我越識越多嘢啦~
繼識爬喺度之後,我又識多咗一樣嘢啦~
媽媽話就連瞓都吾識定喇~吾再係一舊飯啦~

媽媽的話:
其實果陣我成日都見到b仔陏嚟陏去,想自己起身,想坐,好有自主權,好主動,咩都想搞,想攞......
係果陣,我覺得自己個仔好叻仔,因為我覺得佢咁樣,好快就會學識坐,學識企......學識其他嘢!
到依架,佢識坐,識企,識行,識走,識叫媽媽,識好多嘢啦~
我又好想佢吾好大得咁快,我好掛住佢以前一舊飯咁果陣呀!!
其實都好吾正常,邊有媽媽咁架,吾想個仔大,大吉利是咩~
可能我真係好珍惜佢細細個果陣ge時光啦~(雖然佢依架都係好細)
我真係好鍾意佢瞓係度望住我,依依呵呵,眼仔碌碌,間吾鐘有啲古怪表情,
但係佢又吾係好知自己做緊乜,任我錫,任我抱,任我攬果陣時果個樣呀!
真係好得人鍾意架~~!
總之我就好鍾意我個仔,無論佢任何方面,
就算曳定乖,我都好鍾意,好吾捨得佢咁快大呀~
好想同我個仔相處ge時間係無限長呀~
依架我個仔淨係識行識走~攬實佢吾比佢周圍走咋,都嘈生晒啦~
第時佢真係大個仔,淨係識錫女朋友,吾錫我果陣,我都吾知點算好喇~
吾洗講我一定好傷心啦~~
不過咁,我個寶貝仔依架先得果一歲幾,其實我仲有排捱至真呀!!
諗埋啲冇謂嘢,我真係傻媽媽呀~
其實b仔你依架都有你另一個勁可愛ge一面,媽媽一樣好鍾意呀!!
你依加識錫我,識飛吻,識bye bye,識指揮我去攞嘢食,識要求我同你玩........識好多好多嘢,
樣樣嘢媽媽都好鍾意,好自豪,好榮幸,令到我覺得好幸福......
寶貝仔,無論你幾大個仔,就算你吾准媽媽捉實你吾比你周圍走,
媽媽都咁錫你,咁鍾意你,咁愛你架~
老天爺,求求你吖~我同寶貝仔,同傻爸爸三個人一齊ge時間可以比正常時間長吖!!
(發緊夢........)

呢張係媽媽之後照到我打橫瞓ge相,哈哈,我個頭頂住咗,
轉吾返打直瞓,果陣我掙扎緊呀,媽媽仲笑我添~
果日我仲發緊燒,08年7月30日,發燒都吾定......吾知好嬲定好笑!
我都好耐好耐冇瞓bb床啦~因為會爬出嚟呀!!
我係危險人物.......