鋒，生日快樂！

尋晚好好訓呀…一訓就訓到今朝！八點幾再打比阿婷，佢又要賴床，足足賴左半個幾鐘…之後我就用極速汁野，換衫同埋攪個頭…而家後面D 頭髮唔夠長，好難打理…前後用左十分鐘都唔夠！跟著嘭嘭聲去搭車，點知夠車走鬼左，個時已經好趕了！真係再等架車的話就會遲到了，最後選擇行路…行下跑下，去到都係遲左五分鐘。不過佢仲未到，我就係度睇報紙等佢…

之後就一齊搭輕鐵落元朗，買左個麵包先上去…上到去都仲未可以開始，係度打左陣機。今日教O Chem，嘩…真係好多唔記得晒，之前最有信心係O Chem，而家真係屎到痺…已經開始溫架喇，不過都係未可以好似之前咁熟。而家間唔中都會比下阿Sir 串…唉！慢慢開始慣架喇…今日阿Sir 話補到好早，咁岩我地又要幫阿鋒慶祝，所以十二點幾就補完了！

之後同婷同埋慈恩行去拎蛋糕，返到學校，我地都仲係早到…放在係雪櫃之後我就出左去搵阿Bee 同埋Winnie幫手拎野喇，去到佢地岩岩揀好野要買o既，之後埋單時差幾蚊，我就入去拎多筒薯片，最後岩岩好八十蚊，唔多唔少！真係叻…返到去得阿鋒一個到左，成班友都玩遲到，>_< 要個主角等！阿鋒真係慘…生日仲要等人！唉~真係無乜邊個係唔遲到…

之後邊溫書邊等…最後唔等明賢就開始了，因為佢剛剛先係屋企出門口，有排等。之後我、婷、Bee去拎Cake，好似好鬼祟咁放係小食部個邊，其實都唔需要架喇，不過都想有DD 驚喜…最後唱左首生日歌就開始食野！仲影左幾張相添…個Cake D 芒果味麻麻，不過算幾抵食…又有汽水、又有薯片…幾好！

食完之後吹左陣水，就返去溫書了！今日要係咁溫O Chem，真係好唔掂…點算好？如果我中六時已經真係比心機聽書，唔駛對住D Chem咁苦惱，而家真係唔知點攪D Phy Chem…仲有InO Chem。唉…之後溫溫下又比黃進佢地玩，今次話玩問人拎電話，真係估都估唔到佢地成班玩我一個，成班都出鎚…唉！輸左先知個懲罰係咁…無奈！>_<最後比人話懦夫……

之後溫到六點半就走了，送左阿婷返去。佢要出去酒樓食，而我就做乖仔返屋企食，不過今日D 餸麻麻，唔算太好味。最慘係老豆買o既即食餸完全唔掂，好似整左幾日都無人買咁，真係好難食…唉！都無咩胃口喇…之後九點度去左接阿婷，之後就返屋企溫書了！成日都係O Chem 真係對到悶，最慘係對極都唔記得，幾時先可以溫得晒O Chem？Phy Chem 我真係有排攪…唔知點算。最後溫到十一點就去訓了…好眼訓！