今日係一個好日。今日正式發行郭富城踏足紅館十週年的舞台寶典演唱會DVD版。

一早已經唔願起身了，好遲先起身。拿拿聲去整野，07:40先出門口，好彩班車冇咩人上到咋。之後到左西鐵站，07:55咋，估唔到咁早到。之後返到學校都冇咩人，由於星期五要排隊，呆坐左十幾分鐘。排隊時仲要奏國歌，天橋上的人係度睇Show~~中化個Miss話亂播國歌犯法架。信義真係無聊~ 返到課室，休息左一陣就上UE了。做左個Test，我已經盡力做左自己識個D了，之後就訓左一陣，Miss 叫醒我問我做完未，我其實都只係諗住休息一陣，之後就會做架喇，比佢叫醒，只好做喇！真係好難，以我D咁o既程度邊有可能會識呀？ 我好比心機去一個一個咁試，做左我好耐，最後都唔夠時間，只好撞！唉~ 其實以我而家的程度黎睇，真係連小學生都不如。我都唔知點解自己可以升到中七黎讀，讀黎真係好晒氣。遲下應該要進修一下英文了！

完左個Test，小息我諗住訓架喇，點知比阿良撩我玩啤牌，去到得四個人，剛剛好鋤D。輸一隻就五下掌上壓，有得炒。之後第一場好易就贏左，輸的係佳佳同埋阿良，我仲可以炒到阿良10隻，佳佳就幾隻！哈哈~第一場，阿良就要一百下掌上壓了，因為要即日清，所以佢只好慢慢做，由黃進頂上。第二場輸鬼左，做左三十五下！>_< 之後最後一場，好彩贏返。由黃進同佳佳做。玩三場贏兩次算係咁喇，不過Jerry 最醒，次次拎第二，唔駛做！佢真係識用金手指。

上Chem 堂時好專心聽書，真係留心到不得了，忽然對Chem 好有興趣。(可能有補習的關係喇！)好快Chem 堂就完左，真係唔想佢咁快落堂，好想繼續聽落去，真係我想聽時時間又過得特別快，唔想聽永遠都聽唔完咁，豈有此理！Then 中化堂真係悶到嘔泡，佢講書超悶，講書講到好似講古咁。唔識用電腦又要用，真係好唔掂，忍唔到佢了，中化堂休息訓下。個Miss 教得真係好一般，照書讀，鬼唔識咩，我自己睇仲好喇！一打鐘，成個人精神晒，汁書包走人。

同黃進一齊走，佢陪我去睇DVD，去左第一間好多人，搵極都搵唔到，冇問到人就走了。之後去左提錢，黃進不斷係度問我野，真係好多野問呀佢，講佢又唔信。唉~之後送左佢搭車，自己一個去其他唱片舖睇碟，大馬路前新世界位置個間就話DVD 遲D有。聽到真係呆左，佢識唔識做生意架？ 咁遲先入貨，邊會多人黎買架？ 真係傻架！仲要出面播Aaron Concert VCD，吸引左人黎又冇DVD賣，真係好白痴，抵佢D野要平賣。人地出面個D一早已經比人買晒，要再返貨，人地已經第二轉，這間舖一轉都冇，真係食得屎，出面仲炒到$298，真係幾激呀！證明這個演唱會真係有大把好評，更被喻為十年難得一見的演唱會，絕對係無錯。唔睇真係走寶。

之後去左喜利唱片，成個元朗最平應該係佢喇！去到睇左一睇，搵唔到，之後問個Sales姐姐，終於有了！睇左一睇，仲問清楚有冇野送添，但包裝已寫左有寫真附送。去到俾錢時，見到幾個人都係唱Aaron 的Concert，仲要係特別版DVD添，之後我仲同佢講清楚我要DVD 特別版，$185。加廿蚊就有Poster，不過冇加。之後就K73 返歸。

返到屋企即刻開機睇，連野食都未整。真係好正，一邊睇個演唱會一邊食麵，我都未試過食麵要咁耐架，用左成廿分鐘！哈哈~ 阿王真係太吸引了，佢D 魁力太強了！雖然之前親身睇左佢Concert 幾次！但係睇返DVD 一樣係咁震撼。一Load 到睇到D聲已經成個人震晒，真係好有Feel。係咁多個歌手之中，係得佢一個係舞台演出得咁正，咁有震撼力，咁有Power。係佢令我有種好特別我感覺，就算我鍾意劉浩龍D 歌，但係都唔會有種特別我感覺。阿王真係好正，睇到佢演出同埋聽到佢把聲已經成個人起晒雞皮，真係好難形容到個種感覺，總之成個人比佢吸引住喇！

睇左2004個Concert，已經一年前的，真係好似尋日發生一樣，好正呀D場面。記得一年前睇左兩場，零五年睇左一場。一年前的我同現在的我已經有好大的對比，好多野都變左了。我真係估唔到呢~Anyway，睇晒成個2004 Concert 真係好掂，不過我都係覺得零五好睇D。可能零四睇左兩次，零五睇得一次喇。之後都冇時間睇零五了，因為一睇就要成三個鐘，冇咁多時間！返房玩電腦，打返之前的日記，點知發現我買的唔係特別版，係普通版，得44頁寫真，激氣呀，咁都可以呃人，冇得別版就話冇喇，仲要話係特別版，真係無良。不過好彩冇比佢呃錢姐，唉！冇得買限量特別版真係好可惜，不過有阿王睇都算喇，唔買都買左囉。之後同老豆嘈左幾句，佢問返我前日的事，唉~話冇野佢又唔信，對住佢我都冇咩好講，講咩都唔岩，都唔信我，我無話可說。

今日睇完個Concert 真係好正，真係愈黎愈鍾意Aaron。但係睇完令我回想返一年前的事，我真係變了好多好多！！