星期六,琴晚臨訓前已經落緊大雨,應該係5點幾呱,到今朝9點起身重係落緊超大,我諗都係休息啦今日,sms比峰爺同嵐姐休息,1點起身啦,上下網吹水,出去露台睇下有冇水浸啦,嘩!!嗰一刻超開心,即時攞把遮落下玩水....哈哈,有d路人狂望住我係條街度走嚟走去,勁白痴,之後上返去,悶悶地就同咗峰爺出大陸,諗住著拖鞋去架因為水波嘅關係,不過一落到去無浸啦,再返上去換波鞋,出到去我哋食咗嘢先,再行下地下商場,我買咗條褲即換,之後就去再按摩,按咗一個鐘,再按多一個鐘,第二個鐘我都已經訓著咗啦....比佢姦咗都唔知啊訓到,重冷親....佢哋d冷氣超勁又加上淋咗少少雨,個鼻失失地而家,按完就買咗幾隻老反game,返到嚟澳門各自回家啦,落雨唔好叫人車啦,咁就自己行返去啦,行到去三角花園見到一隻好可憐嘅流浪狗,我覺得都未夠一歲,淋住雨周圍走,好似搵緊嘢食咁,之後我就走咗去7仔叮咗隻雞肶比佢食,好彩返到去隻狗重係度啫,坐咗係三角花園陪咗佢一陣,等佢食完就返屋企啦,之後佢狂跟住我,如果比著以前我一定會攞佢返屋企,不過而家屋企無位....無計啦,最多我聽日過去睇下你啦,再行咗一就無跟嚟啦,之後我就返屋企打blog沖涼訓教,之前開咗個家庭會議,講緊今年開鋪頭嘅事.....

  星期五,琴晚煲碟煲到成5點.....追下追下都唔知咁晏,但係今朝8點就起身....沖咗個涼就返工啦,不過今日嵐姐無返,得我自己做,唔緊要啦都要試下做架,今日都拉咗成35盒,雖然係慢咗好多,用多咗一半時間啊,但係我又覺得幾好喎個感覺,放工之後就去買咗個聰明豆耳機,好得意架,之後返到屋企沖完涼就上網down歌,搵咗成兩個鐘先down得兩隻歌,換好衫就返濠江磨時間,去到原來有籃球比賽,同咗啊吳華銳傾咗一陣計,睇睇下波,見到一個miss好似我小學同學,嗱.....我唔係溝女啊,原來真係我小學同學啊,再講咗一陣嘢,之後佢問我去唔去個校友聚餐,我未定啊,傾下傾場波都打完啦,我又係時候去舒適堡啦,同之前一樣都係行去,當熱身先啦,行到去換好衫啊政已經玩緊,我同之前一樣都係玩跑樓梯機先,再玩d健身,玩到咁上下,就去蒸身啦,吹咗一陣水,原本峰爺話嚟架,之後又話要汁屋.....學我,玩完就約哂d朋友出嚟飲嘢吹水,今晚有我,啊政,峰爺,tom仔,四方,彬仔,最後有梁穎欣,又話又笑,其實我哋都係逢星五先約出嚟飲嘢吹水,感覺會唔錯架真係,講下講下,傾下傾下,笑下笑下......原來已經成1點啦,之後梁小姐走先,我哋幾條友就係皇朝走下,啊政神咁早走咗,之後就各自走啦,峰爺車我,又好似之前咁我哋唔係即時返去,我哋會周圍走,今次我哋入咗永利行下,唔好誤會喎,我哋係唔會賭錢嘅!!之後我哋諗住過葡京.....行行下,我諗唔好啦.....再行一陣又出事啦,即時返去攞車走,行到去利澳,峰爺話不如入去睇下,無所謂啦,我都未入過,睇睇下撞到鍾小姐,say咗個hi就走再啦,之後出咗去就嘭嘭聲返去啦.....成3點啦,我重要追惡作劇2吻架,重要收衫.....shit!!!

  星期四,今日有d唔同....去咗qooza打日記,今朝到而家都勁多嘢做,神咁早就同隻死肥猫清屎啦,我發覺佢d粮半個月差唔多食哂咁,重有針針佢好似發脾四,佢將d木棣整哂出嚟,我搞到又要掃地,可能我成日唔理佢呱.....針針對唔住啊,等我一陣出去買d嘢比你玩啦,之後就到洗衫啦,一入到房.....唉,堆衫重高過我張床....重有次所嗰堆,又好似平時咁一洗衫就會落雨,我估都要洗雨三機啦,之後差唔多要返工啦,個人開始攰攰地,一直拉到5點幾啦,打算講哈哈收工,點知爸爸走入嚟講有人訂咗六十盒.....訂咁多做咩啊!!!咁我就同爸爸一人一半拉完佢啦,返到屋企未入門口啊政就打比我,叫我快d過去舒適堡,頂....比我停下十分鐘都好啦,咁我就話晏d過去啦,又要等人電話攞嘢比人.....都唔知幾時過到去,重有啊,我都重未曬第二機嘅衫,今日我一定比人落咗降頭啦