琴晚睇完宮心計,個結局令我胸臆不抒不快,

首先係三好,無錯佢響結局篇係比金鈴搞到雞毛鴨血,但成套戲,由做女史,升掌珍,上司珍,做埋德妃,平步青雲,而且,得閒賞下瓊花,整下鳥巢,溝下仔,做下好人,做司珍做到佢咁優閒,人際方面,萬千寵愛在一身(甚至一生),連「惡婆」米雪都對佢陰聲細氣,關懷備至,皇上同高大人視佢為女神,如珠如寶,最後雖然還鄉等情郎,但仍生活無憂......雖然套劇係想宣揚「三好精神,好心有好報」,都似乎有點童話式.......

跟住係閹人之死,比楊怡一劍搞掂,一個大將軍,比一個妃嬪一劍KO,好多人覺得唔合理,但其實有跡可尋,事實係麗妃武功蓋世,自少入劉家做內應,以入宮謀反,以下係證據:

打到袖都飛起

而金鈴結局係癲左,但其實唔係慘,比起佢日夜害人,勾心鬥角,而家反而生活平靜,幻想自己係三好, 自覺受人寵愛,德高望重,有何悲慘可言?

而尚宮局,阮司設覆行番20幾年前ge諾言,同萬將軍兩個回歸平民生活,仲疑似搵到自己個仔,可喜可賀(不過只係憑同姓和出生月份一樣就話係佢個仔,咁周街都係....算la,都係佢地關心就得la)

反而有點無奈就係鍾尚宮,好姊妹剛剛和好就要離別,身邊得番個小順,而且三好同阮司設走佬,4變1,成大房人得佢同譚司膳管,唔通譚艷裳一人做哂譚司制,譚司珍,譚司膳,譚司設??????

至於最後,三好同高大人撞番,我個人覺得佢係無恢復記憶ge,既然佢係失去記憶,點可能三好講兩三句就無事?我諗佢只係因為三好明艷照人先眼定定望多眼,下一句就會話:「夫人,我識你ga?」跟住三好就將計就計,大送秋波,重新搞掂高大人,然後..........真正大團圓結局