呢排真係多人生日,首先前幾日係Marco,班人去左韓燒,間野叫漢陽樓(聽落以為邊棟屋村大廈名),席間又見識到世傑本色,做左我同張明ge米飯班主....但更值一提ge係,韓燒燒到起火,仲要係十級大火(詳見下一篇「烈火狙擊 4」)

琴日就係毛毛生日,24小時馬不停蹄,首先係對出街鞋年事已高,要引入新力軍,於是以$359重金禮聘一對新波鞋....其實對鞋響會考期間已經睇中,但一直都未買,而家對converse又飽經風霜,所以都係面對現實....本來諗住德福,淘大近近地搞掂,點知唔係無戈個款,就係無o岩size, 再唔係就係無discount,要$559,睬佢都傻,雖然時間就是金錢,但跟住夜晚ge活動都係旨意呢$500,所以都係向現實低頭,走去旺角波鞋街買.......

跟住就要買生日禮物,本來有人陪買幫下眼,但比果位先生放左飛機,又一次扔低我一個......去信和,潮特睇左一輪,都唔o岩心水,最後都係返番淘大睇,終於買到,但呢個時候已經係6點有多.....

又見到佢:

返到屋企,換套衫,最緊要換埋對鞋,跟住無耐就收call,出去重頭戲

今次又係CEO,Green Box皮爾修,搞到戈度好似已經變左第二個屋企咁.....CEO ge 奸計一步步已浮現出尼,呢排世界盃,同我玩食花生,強制性花生收費每兜$69,仲要唔知咩「3進2」結算花生5兜,所以表面上寫每位$109根本就係糖衣,不過個時間就長得驚人,由19:30至到05:30.........期間走個嬌聲嗲氣ge大姑娘入尼......sell啤酒,但銀包始終係現實ge,比左成堆門釘佢摸

入到去,由於果位先生係阿根廷擁躉,順理成場7:30場波無得走雞,波我雖然唔識睇,但見到果位先生響入波戈下個亢奮狀態,同楊過果下個黑面,相映成趣,另類睇波樂趣油然而生.....完場4:1,楊過好似用完霸王洗頭水洗面咁,一瞼烏黑

波後,回復K場,期間發現唔少歌幾好聽但未之前無留意過,好似李香蘭同陰天假期,onj 基哥用廣東話唱國語歌,仲要變調...「能不能給我一首歌的時間...緊緊把那擁抱變成永遠」慘被洗腦....因果循環,基哥被班會活動懲治,三四個人"責"落佢度,我在旁落井下石,推波助瀾,卒之好似擠牛奶咁,剛剛食完野ge基哥被「擠」左少量嘔吐物出尼..........................

去到3點幾,每人都開始聲撕力歇,2杯野飲quota用剩一杯,CEO唔夠greenbox好ge就係無得任斟....但原來可以叫清水,見唔使錢,前後叫左十幾杯,但有次唔記得叫「暖」水,搞到d水有「冰」,八杯「冰」水出現響楊過面前....

5點幾埋單走人,埋完數,位位$180,我又唔夠錢,要果位先生落街禁錢找數先,而家周身數未還....

本來果位先生因為聽日要上堂,嚷著1點幾就要走,最後拖拉左幾雲,最後都係5:30先跟大圍走,唔知佢上堂戈陣點呢...?

頂,唔覺唔覺又打左咁長

$69花生