前日太夜番龜,琴晚又出左去幫人做d野,所以襯而家開工前打埋呢篇野......

放榜後第二日,依然有唔少人仍為學位奔波,令人擔心.......本來之前預定今日同ben ben補祝4月ge生日,但可惜因為升學問題,順理成章取消左,但今朝無端端一個追魂call,張我從周公果邊綁架左番尼:「ben ben話唱lunch K,去唔去?」 心諗:「e?唔通已經有左著落?」原來唔算係,只不過有左一定ge打算,不過點都好,能夠有呢個心情都係一件好事....反正怨天怨地都唔會有學位跌比你

跟住我就應約起行,知道家健到左,諗住打比佢,點知原來無佢電話....於是打去張明問,頂,我張將0字聽錯做6字,搞到打極都唔通.......不過好彩打唔通,唔係唔知邊個聽就shit......去到一陣,同家健唱左一陣,成成佢地到埋,唱唱下,無la la唱埋《直到你刮到我》(上youtube睇埋"MV").......不過講起就扯火la,NEWAY愈來愈狗,5個人都係得12-3點....做要完左無新歌廣告,搞到呃K唱都無....

跟住各自各散band,張明陪ben ben去高雷搵中六,我同成成去睇戲,家健去向不詳(btw, ben ben聽講已升到中六,唔係係咪呢間呢?)

呢排都睇左好多戲...今次就係睇《魔法師的門徒》,本來諗住買即場飛睇,點知得有場3:30,但家下已經3:50.....所以買左張7:50(買完成張飛逐隻字同佢DEP,費時又俾錯飛....),既然係咁,所以各自回家一陣先,我就有事出長沙灣一陣....

差唔多7點,我響長沙灣番去果陣,橫風橫雨,d雨真係打橫飛過尼,把遮遮到上面,側邊已經濕哂....把遮ge作用只有令我頭頂無濕

幾經辛苦,終於番到九龍灣,成成打尼,佢都到左,見時間尚早,於是又去冒險樂園,今次都係玩果兩樣野,不過氣墊球今次4個"把手"全齊,於是兩手並用 XD 玩左一輪,可惡,淨係和過成成一次,都係贏唔到,仲要玩玩下有個小朋友尼睇住,搞到我唔可以爆粗....

玩完就去睇戲,今次都係逃唔過宿命,遲左10分鐘....今次套戲終於係適合我睇ge戲,上次潛行空間唔打影評,一方面真係太多野打,另一方面係我有少少睇到一頭霧水,所以無謂獻醜

今次呢套劇情直接了當,老法師巧合下遇到男主角,發現男主角就係遠古法師ge後人,男主角不慎釋放被封印ge魔頭,世甲面臨危機,老法師決定加以栽培打boss.....劇情方面的確驚喜唔大,但創意仍然係有ge,今次又玩physics,高壓電,天線,電磁波,最尾仲用埋科學力量打贏boss,比起一貫魔力大增出超必殺,有一股新鮮感,而且笑點,愛情,特技效果都不乏,呢套可以話係一部為青少年度身訂造ge電影(可惜比成成睇到套戲有一幕穿崩位....)

睇完再去埋淘大間煎餃子食飯,試左碟叫「口水雞」ge雞,同餃子都ok好食,只係個湯大罐頭湯feel, and胡椒擺明過多....叫左2杯凍奶茶,佢野飲位就響隔離,睇住佢沖杯奶茶都搞到雞手鴨腳,仲要加完茶先加冰,搞到陣到一手都係......確有一番樂趣

食完番到MTR就散水,個心開始倒數,下次見面應該已經係10號,16號就.............唉