今日個書包勁輕,咩書都唔洗帶因為今日2-3堂去聽個唔知咩濫藥講坐,最尾6-8堂去九龍華仁中學做個唔知咩學術交流,今日中文又係細堂,唔洗用書,本來仲有物理,但由於我琴日執得太high,張本物理書都無執,最後成個書包一本書都無,不過好彩我物理堂坐最後面,阿sir都唔知我無帶書,真好

講到去華仁,首先個細徐sir都唔知有無用腦諗的,叫我地42人鴨仔團咁搭地鐵去到油麻地(以Rocky講法,應該叫港鐵先對),去到果度仲要響月台排單行集合搞到我地好似幼稚園生去旅行咁,其實租架旅遊巴要幾多錢呀?扣埋我地幾十人D車費都差唔多la,唉......都唔知成個過程有幾多個途人響度笑我地

去到華仁,感到無比的自卑,果度地方面積都唔知係我地學校的唔知幾多十倍大,淨係佢地果個[小]聖堂已經係我地[大]禮堂的2倍有多,佢地果度仲有9個運動場,1個瑰麗堂皇的圖書館同canteen..........仲有好多,數之不盡,佢地每人個書枱個櫃桶有得鎖,即係可以每人一個小locker,真係令人羨慕

令我慶幸唔響果度讀的就係佢地個神父,聽講佢地做倫理project,佢地個神父阿sir係唔比用電腦,每人都要手抄一份,做死人咩,而且呢個神父聽講話係中文碩士,但佢講D中文口聲多到我真係聽唔明,都唔知佢個碩士點考番尼