今日係假期前一日好多野都要今日交，真係忙到嘔，忙到連水都唔得閒飲，仲要成７點半先有得收工，真係歸心似箭好想怏ｄ返屋企，見我的寶貝，寶貝你等媽媽返黎抱你同錫你啦．

今日係ｂｋ又識左ｄ新朋友啦，可能好耐無甘同人傾電話啦，一講就講左４個鍾，lee個間直係我甘多年嘅新記錄

今日好早起左身仲攪好晒d野，同希希７點半就出門口去返學，見時間早就比希希係公園玩一陣千秋，之後就去番學，送完希希返學去搭小巴，點知唔洗８點半已經返到公司附近啦，就打電話比Carrie約佢一齊食早餐，返到公司唔夠１個鍾就開始忙啦，因有同事放左大假，我要幫手做埋佢ｄ野，仲之就係一句：忙啦．好彩忙極都可以６點收工，返去見囡囡姐，返去食完飯洗好碗就同希希玩左陣，點知兔兔比左個網址我，係攞免費濕地公園嘅飛，到時就可以同希希去玩啦，到了差不多十點佢老豆打反黎搵希希，係我接電話架，佢話要同希希傾wor，我有叫希希聽架，但佢唔肯我咪照直同佢講話希希唔肯聽囉，點知佢又話我要我攞個電話比佢，甘好啦攞左個電話出去仲放係個囡對耳到tim，但係個囡都係唔聽都唔關我事wor，個囡點解唔肯聽，我諗佢都心中有數啦，之後就倍希希訓，訓前我問希希錫唔錫媽媽，希希答我話錫仲摟住我tim，我問佢愛唔愛媽媽，佢又話愛，間直比佢冧死．

今朝如常同希希上 playgroup，今日２個導師都請假得番ming姐姐同yee姐姐代課咋，yee姐姐之前都見過，但ming姐姐就......希希初初都唔敢同佢地接觸架，但好在過左一陣都ok，但係就要痴實我囉，但甘講佢痴我都好過唔痴ma，上完 playgroup之後同希希去新屋，因今日係正式入伙，我只係入去煲一煲水，煲好就走得，煲水時我周圍睇，原來包租公已經同我裝好窗花啦，仲同我噴左順潤滑劑落部鐵閘度，之後我同希希就去買左盒叉燒燒肉飯２份食，原來希希都好鍾意食叉燒架，我比左碗飯同埋叉燒佢，但係佢就食晒ｄ叉燒先食飯，食飽飽就去午睡，希希訓左一個鍾到就起身啦，我就同埋佢老豆落左樓下公園玩吹波波，佢老豆同我講話叫我比希希佢，等我第時再婚先決定希希跟邊個，又話怕我第時個老公攪希希，我覺得佢好自私，做成今日要離婚係邊個錯，到今時今日佢都話係我唔岩，我鬧佢，我Check佢Ｄ野，話我點過份，我只問係知道佢同公司個妹妹仔(Rachel Wong)開始之後，我先睇佢ｄ野，我同佢講我唔睇，可能連而家有第３者出現都唔知，仲有就係佢星期一至六係大陸跟本就比唔到時間個囡，只係要佢呀媽(麻麻)幫手湊，仲話我可以星期一至六去睇個囡，有無搞錯架，星期一至六去睇甘即係同個囡跟我有乜分別，我諗真正係佢唔想比錢養個囡．

琴日一早請在假，諗住今日去新屋清潔，所以一早就出門口，去左樓下食早餐 (本來諗住買個麵包就算啦，但係諗諗吓都唔知仲有無機會係lee間餐廳食，算啦貴就貴d)不過又唔係成日都去食算啦，之後就去買左d清潔用品等陣開工，見仲有時間就去左西九龍實惠睇吓野，我仲係海馬買左個枕頭，之後等埋 Astor一齊去新屋，我地去買燒肉，記得個老板娘話Ｄ燒肉要切開５份，我又唔識，甘同個燒肉店老細講話要一舊燒肉，唔洗甘大舊架，唔會食返架，仲要切5份ｗｏｒ，個老細一聽到切５份就話你係唔係入伙呢，入伙我唔比 lee d你呢，我比Ｄ肥豬肉你啦，佢之後切開隻新豬，佢應該係切Ｄ人地唔會買黎食嘅比我，不過唔緊要啦平咪得囉，之後就返去新屋度開始拜４角，我記得個老板娘同我講話要由東面拜起，我攞住個指南針，但係又唔知點用，打去問人，點知個人同我講話指南針係指西架，我都Ｒ晒頭，都係問第２個好Ｄ，之後攪好晒．就開始頭焗蝨，一焗要焗２－３個鍾，甘長時間我地就去左飲茶，飲到４點岩岩好．

飲完茶去買多少少野我地就返去新屋大掃除，上一手真係唔知點住dirty要暈，我地用左幾個鍾都係洗好個 Toilet同廚房d牆咋，要下星期再開始第２場．