終於到左星期四，呢幾日都唔好過，都唔係因為做野o既關係，而係距離六年級畢業日子越o黎越近，今日倒數都係只得番一日，返埋聽日佢地就離開學校，都唔知幾時先見番佢地，又唔知幾時會o黎探我

不過好好彩，今年度好多乖仔乖女都獲派到元中，當然有某 D 仔女有小意外，不過還可幸！

麗儀成功入到元中，雖然麗儀成績一向有 D 令我擔心，但係亦希望佢好好利用呢次機會，o係元中努力讀書，追番上o黎，起碼唔洗我咁擔心吖！仲有當然對麗儀有 D 期望，麗儀俾我感覺好乖巧斯文，唯獨太內儉，有時要觸摸麗儀o既性格都有少少難度，不過我想呢年o黎同麗儀建立o既感情都有唔少，呢個小朋友實在令人值得痛o鍚

小晞婷亦都係入左元中，小晞婷成績一向都唔洗我咁擔心，入到元中亦係我意料之中，只係佢俾我感覺太小朋友，可愛歸可愛，始終上到中學都係大個女，千萬要小心做人，最怕小晞婷去到中學會俾其他人蝦，不過，小晞婷咁可愛，我諗都唔會有人捨得欺負小晞婷o既
期望有一日，會o係更大型比賽上面見到小晞婷，努力比賽，到時候我一定到場支持小晞婷！送 俾妳吖

詠欣亦係元中，計落都幾多小朋友入到元中，都好，一班朋友一齊，上到中學都唔會太難適應，不過經驗話俾我知，中學時候好多時都會各自搵到新朋友，希望我o既呢班小朋友o係識到新朋友之餘，都不忘小學時候建立o既一份情誼

6A班好多小朋友都入到趙中，當然好多都係理所當然，唔太擔心，但係6A班實在太過八婆仔，上到中學多左自由空間，哇 何止八婆仔呀！簡直有變成 街巿 o既 Potential 啦 

連詠文都入到李兆基書院，坦白講我對呢間中學唔係有太多了解，只係知道話幾好，希望詠文努力，唔好淨係o係球場見倒佢，仲要讀到好成績！當然，我想終有一日會o係電視上面見到詠文為香港大放異彩！
多謝詠文到今日都仲會送朱古力俾我，朱古力事小，心意事大！！！

數o下數o下實在有太多小朋友啦，我有好多固然知道派o左去邊間中學，但係亦有好多唔知道，總之都祝願佢地努力讀書，為自己前途邁步

.

.

.

真係唔知幾時先再見到呢班朋友仔呢

好唔捨得呀

今日畢業禮，就如往日一樣，忙到發癲，所以都有好幾日無寫 Blog

上禮拜綵排o既時候都見小晞婷o係大合唱時候企o係中間，但係今日竟然走左去左邊，攪到我企o係右邊都覺得小晞婷好遠！

講番畢業禮，綵排過後我都知道要做乜野，不過，自私 D 真係唔想有畢業禮，更加唔想o係畢業禮上做野，畢業禮雖然係代表D小朋友大個仔大個女，畢業啦！但係亦都代表佢地要離開小學，好唔捨得 

成個畢業禮，最 Touch o既地方當然就係大合唱啦，綵排時候六年班班友仔已經喊到豬頭咁，點知到o左今日正場，果然不出所料，學生喊到豬頭不特止，連老師、家長都變哂豬頭，最衰都係兩個李老師，李小燕搵埋D咁 Touch o既曲不特止，仲親自填詞，攪到一唱就喊哂口；仲有果個李慧芬，人地都喊到豬頭咁，仲要特登走上台，再整喊D，真係俾佢激死 ，我都已經忍得好辛苦，忍住唔喊，但係俾阿芬攪一攪，攪到我眼都紅埋！計落我都有好幾年無o係畢業禮上面喊囉，差D俾阿芬攪到我番抄

頒獎時候見到小晞婷上台攞獎，好開心，當然仲有麗儀啦，家希啦，嘉琰啦，等等等等，數唔到咁多，好高興！有D老懷安慰o既感覺，仲有o個個詠欣八妹仔，剪左個頭黎迎畢業，呀！唔係，應該話係剪左個髮型，幾特別！唔....幾特別！

畢業禮之後都有學生搵我影相，又係老懷安慰，但係就缺少左我想同佢影o個個小晞婷，當然仲有詠欣，小晞婷，一放學就走左去邊呀 搵極都搵妳唔倒，唔同我影相，哼！我嬲！

今晚同心怡傾左好耐，佢話今年考得都還好，唉！真係俾佢嚇親，始終心怡都唔會令我失望o既

聽日就放榜啦！求天主眷顧佢地，賜力量俾呢班小朋友，勇敢面對聽日o既放榜日