好耐都無去過見呢個家庭醫生了, 講真, 佢又唔係恐怖, 我又唔驚打針, 不過無咩事盡量都唔會去見佢…..但係今朝起身的時候, 行路都行唔穩了, 好似飲醉酒咁, 之後喉嚨好痛, 連吞口水都覺得痛, 係呢個時候真係覺得呢種感冒比係身上開一刀仲要辛苦, 因為每一秒都係辛苦, 唔會停止咁, 不過又唔想同瑜講得咁迫真, 唔係佢又話唔返工走黎陪我, 唉, 陪我都唔會好架啦….

今日本來真係唔想睇醫生, 不過最後都俾我爸媽捉左去….

醫生話我燒到103度, 問我燒左幾多日, 我答2日, 佢話燒左兩日, 如果過左3日, 你都變傻仔…喉嚨發炎, 發到好似豬頭咁….講左好多笑, 咁多年都係咁攪笑, 之後問怕唔怕打針, 我話醫生唔好當我小朋友啦, 佢話我怕你話貴咋, 我先問你怕唔怕打針….好冷呀個笑話….之後睇完醫生, 返屋企訓左一覺, 佢d葯真係使得, 一覺就退左燒了, 不過成身都係好似火燒咁痛, 醫生話呢種叫火燒身, 係發炎的症狀, 正常的….好左就唔痛了…..

今晚爸煲左粥俾我食, 魚腩瘦肉粥, 不過我無咩點事, 因為我食左兩啖就想嘔, 或者係粥物的反應, 吃到魚就想嘔, 結果益哂佢地呢d唔係病人的人吃….我就食米線….唉….本來好好食的野係自己面前無得食…呢種感覺真係難受, 等我好番, 我自己煮過…..哈哈