下係我o既一d分享，我呢個故事，可能比較似日記多d，
所以會有d悶，因為我除左會講下我同女朋友o既野，
仲會講下我d家人同朋友，
我覺得除左愛情之外親情同友情都好重要，
希望大家鐘意睇
我從來都未拍過施，有時都幾羨慕d fd，我有3個最好o既朋友(我遲d都會講下佢地)，佢地都拍過幾次施，
佢地都好奇怪，點解我身邊從來都冇女仔? 佢地好多時都笑我，問我係咪gay架，
講d咩我唔啱你之類o既野(純粹好朋友開玩笑XD)
直至我19歲o個年，我識左一個女仔
我記得第一次見到佢o個陣係咁：
o個日係星期日，我訓到好晏，差唔多訓到下午兩點
因為前一晚有個fd生日，去左開p
搞到半夜三更先返屋企訓
我本來都冇咁快起身…. 我係俾個電話嘈醒
“喂”
“仲未起身呀? 快d起身啦， 落黎幫我拎野”
“下….”
“仲下咩呀，快d落黎呀，好多野拎呀”
我阿媽就係咁鐘意擾人清夢……
落到黎超市，我見到阿媽o係門口排緊隊等俾錢
佢一見到我，就話佢漏左冇攞到洗衣粉，叫我快d去拎過黎
我入到去，攞左洗衣粉，諗住掉頭行返出去
點知一轉身，就俾架購物車兜野撞埋黎
其實我冇乜事，只係有d莫明奇妙
因為我只係見到一架裝左好多野o既車，但係就見唔到推車o既人
我再行前少少，終於明白，原來我之所以見唔到推車o既人
係因為推車o既係一個細路女，大慨四、五歲到，架車仲高過個人，所以我睇佢唔到
好明顯係細路玩推車推得太快，架車d野又太多太重
所以佢控制唔住撞左埋黎……
我見個細路女眼定定咁望住我，我望左佢一眼，發覺佢對眼幾大，幾精靈，
望多兩望都覺得佢幾可愛，加上我本來就冇事，所以我根本冇諗過去怪佢
之後突然有個人好急咁走左埋黎，同我講：
“對唔住，佢有冇撞親你呀?”
呢個人俾我第一個感覺係……好面善，但係又唔知o係邊度見過
佢係一個大慨同我差唔多大o既女仔，老實講，佢樣貌只係算中上(不過都算靚女)，比佢靚o既女仔我都見過唔少……但係又唔知點解，佢俾到我一種好特別o既感覺，一種好舒服同親切o既感覺，話者係佢o既笑容有一種魅力，令到我有d不由自主……之後我就好似俾佢吸引住，視線唔係好想離開佢
我呆左一下，然後
我：冇，冇事呀
女：(有d怕羞)咁就好啦……真係唔好意思，我阿妹佢好貪玩架，一入到超市就鐘意搵d車推黎推去……
之後佢同佢阿妹(即係細路女) 講
女：你次次都係咁o既，快d同哥哥講對唔住啦
妹：……
女：你唔講我話俾媽咪知架
我一見到咁，就話
我：唔駛啦，我都冇事
細路女本來諗住就咁了事，點知佢發覺佢家姐本來親切o既目光帶有一點命令o既成份，於是頭dup dup，好細聲咁講左句
“對唔住” 跟住就冇出聲
我同個女仔講：算啦，佢都認左錯，我諗佢唔會有下次架啦，係咪呀(我望一望細路)
佢輕輕點左下頭
女：係咪要買朱古力呀，快d去攞啦，我o係度等你
細路女一聽見家姐唔再追究，好開心咁走左去揀佢o既朱古力
女：唔好意思，佢次次都係咁推住架車周圍走……所以我今次先咁惡對佢，想俾個教訓佢……
我：唔緊要，有邊個細個唔貪玩
突然一陣日文歌響起……冇錯，係我o既電話鈴聲
我一睇來電，心知不妙……
我：喂
媽：你咁鬼耐架，去左邊呀！
我：得啦，我出緊黎啦，隻洗衣粉難搵呀嘛(掩飾中)
媽：快d出黎呀！
再唔出去我真係唔知阿媽會哦我哦到幾時，最後我淨係講左句
我：唔好意思，我趕時間，bye bye
我拿拿聲走返出去，但係唔知點解，我有d唔願……
媽：你搞咩搞咁耐呀，你老豆o係酒樓攞哂位開埋茶等我地啦，快手啦！
我又少不免咁俾阿媽煩左幾句……
臨出門口o個陣，我又不自覺咁望返轉頭，睇下見唔見到佢
我見到佢排緊隊，佢又好似感覺到我o既目光，之對住我笑左一下，我又唔知點解又對住佢傻笑左一下……
媽：仲唔行！行快d啦，幾點呀，餐飯搞到咁晏先食，夜晚o個餐想幾時食呀
我阿媽永遠都係咁囉唆……(題外話：有人囉唆你其實係一件好幸福o既事，即係仲有人緊你，關心你，各位不妨想想父母對你的好)
到左酒樓，我見到老豆依然他他調調咁飲茶，等左咁耐，
一d唔耐煩o既感覺都冇，又冇打電話黎催我地
我真係幾佩服我老豆，永遠都係咁好耐性，我老豆就係一個咁o既人，
有耐性，脾氣好，仲幾內斂，重來都唔會好大聲咁話人，不過就係有d怕老婆XD
相反我阿媽有時都幾火爆，講野大大聲，都唔知點解佢地兩個可以走埋一齊=.=
不過阿媽都算係咁，本來自己有間美容院自己做老闆，嫁左我老豆之後就頂左俾人冇做，
o係屋企相夫教子，照顧得我地妥妥當當，所以我地其實都好感激佢
我仲有個妹，不過今日去左同學屋企玩，所以唔o係度
開始食野都差唔多成3點，照計我應該好肚餓，但係我又冇食野，又冇乜點出聲，攪到老豆老母以為我唔舒服……
o個時我其實o係度諗緊野，冇錯，就係諗緊頭先o係超市o個個女仔，當時o既我，根本唔係好知點解會諗住佢，
畢竟我地只係萍水相逢……連人地叫咩名都唔知=.=但係我總係覺得好似見過佢，但係就唔知o係邊度見過佢，
慢慢地，我開始對佢有d好奇……
(待續)
大家俾d意見啦
之後我會慢慢開始減少我家人同朋友o既篇幅，著重寫我o既愛情
不過我唔知大家鐘唔鐘意我講我d屋企人同朋友，我會睇大家反應
仲有，我第一次寫，同埋最近都比較忙，可能寫得比較慢，請多多包涵！
|
