近日我聽聞到幾震撼既鬼故，想同大家分享下...
不過可能已經有人聽過，但唔緊要！
未聽過 ge ...咪聽下囉！聽過 ge 都冇所謂，咪當聽多次囉！

故事係講位於銅鑼灣大坑徑既公理書院，現在已變成高中書院，即只有F.4 - F.7！
但故事發生時係未轉，即仲有F.1 - F.3！

先講講背景...
一踏入學校門口，大堂轉右係教員室，一直走到盡頭再轉右就係洗手間，而洗手間再上連續 3 層既同一位置，都係洗手間...
而每一間都有一塊足夠 3 個人平排照全身既大鏡...

而故事就發生o係 2 樓既男廁...
當年有個教聖經既老師叫 Miss柯，佢係一個極之虔誠既基督教徒，亦都好活躍校內既宗教活動，而佢亦都係呢件事既關鍵人物！

話說 2 樓既男廁經常傳出猛鬼既事件，而就有班 F.2、F.3 既男學生去挑戰呢個傳聞...
佢地有次就三五成群約定放學之後去呢個廁所探險...
(咁其實一個只有 4、5 個廁格既洗手間有咩好探險呢 ? )
原來佢地就計劃緊玩一個同學，簡稱叫 A 同學先啦...

佢地諗住逐一入去個廁所度，依照個傳聞，對住塊全身鏡用 d 好挑釁性既說話o係度講呀、玩呀咁啦，就話有 d 野睇咁樣...
咁當A 同學入左去洗手間之後，佢地就預先安排好呢個遊戲...
班同學就o係出面閂埋門，用個地拖反鎖住，困左 A 同學o係入面...
咁一班人就歡天喜地咁，因為真係好似玩到人咁啦！咁就去小食部慶祝！
就話自己成功啦、困住左 A 同學啦...

過左一陣，佢地都見時候唔早...
加上當時係冬天，放學之後天色係非常之陰暗！
所以就打算去返 2 樓洗手間放返 A 同學出黎...

當佢地去返果個廁所門口，佢地係見到個地拖係原封不動架 wo ...
所以就相信 A 同學仲係o係廁所入面...

但係，推開度門之後...
發現 A 同學唔見左啦...
心諗一定係 A 同學可以自己開到度門、離開左啦...
所以班同學都將個地拖擺回原處，不以為然地各自返屋企...

第 2 日，大家如常地返學，唯獨就係 A 同學缺席！
咁大家都諗住佢一定係嚇病左，咁算啦，就冇理啦！
臨到放學前果刻，班主任問有冇人知道呢個 A 同學去左邊度...
因為呢個同學既家長就打過黎學校話 A 同學尋晚冇返過屋企...
咁班玩 A 同學既學生就開始議論紛紛...亦都仲未知事情既重要性！
於是佢地就唔理啦，返屋企就算！

如是者過左 3、4 日...
呢個 A 同學都冇出現過...咁事情愈鬧愈大啦！
亦都有警察去學校錄取口供...因為真係失縱人口...
咁 d 警察黎學校去調查件事既時候呢， d 學生開始驚啦...
於是就向 Miss柯 和盤托出整件事...
因為呢個柯老師都係一個宗教人，當然都會從 d 宗教角度去處理呢件事...

於是等到個個人放學之後...佢地就聯同呢位老師去返果個洗手間度祈禱...
大約過左一個鐘頭之後，大家都覺得好攰啦，所以就各自返屋企啦...
唯獨是柯老師同果幾個學生就繼續留低...

咁其他人走晒之後...
柯老師吩咐果幾個同學o係門外一邊祈禱、一邊等佢...
而佢就自己一個人入左洗手間裹面，鎖住度門...

過左 3 個鐘之後...
果幾個同學見到柯老師帶住個差唔多虛脫既身軀出返黎...但同時間，竟然連同埋 A 同學一齊由入面出返黎！
咁有個人問點解忽然間會見到 A 同學由洗手間裹面出黎架呢...
咁於是柯老師只係輕輕咁答左一句﹕「o係鏡裹面出返黎！」

故事去到呢度就完啦！
但當中既過程、當中既原因咁點，到而家都冇人知！
就算當時既聽聞者問返呢位柯老師，柯老師都會答﹕「唔好再提啦！」


感想﹕
其實可能好多間學校都會有唔同既鬼故、傳聞！
但點解我一開始會話震撼呢 ?
因為可能係呢個鬼故同我都算有少少切身關係啦！
我仲記得我F.3果年，因為join左學校一個經濟學課程，咁有次就去左呢間學校，同幾間來自唔同學校既同學做交流！
咁我印象中都有去過故事中所講既位置既洗手間！但至於係咪 2 樓，就唔記得啦！

更甚者，令我最大感觸既原因係因我F.4果年，出現過話轉校既問題！
而呢間公理我都有去過 interview ge ...而我亦都被取錄左 ge！
不過最後因為種種既原因，我都冇入到！

仲有既係...我都識人o係入面讀，而家仲讀緊架！
好多都係張記過去！

就係以上呢 3 個原因，就令我覺得比較震撼囉！