試後活動

學校又請嚟一班由澳洲嚟既學生表演唱歌，雖然全部都係英文歌，但我都覺得好好聽呀!而今次佢地唱既歌，大部份都係關於god(耶穌)。

我真係懷疑我地間學校係咪想轉做基督教學校，狂灌輸耶穌基督既野比我地聽。而今次係由一個華僑兼老醫生放下手上既任何工作而嚟，佢認為而家依一代對自己既前途感到無助，所以佢希望到不同既地方教青少年應該點面對，同埋令佢地可以認識到主耶穌，希望佢地可以認識真神。

歡送會

我地準備咗一個歡送會比劉sir，因為佢下年唔會再喺羅定邦中學教啦，亦即係話我地唔會再係學校見到劉sir既足跡。每當我唸起劉sir要走既時候，我都會好唔開心，因為我地從此就再唔可以聽到劉sir既笑聲同笑臉。佢係一個好老師亦係一個好metor，每當我地唔開心或者唔知點面對問題既時候，佢一定會開解我地同教導我地點面對，所以佢對我地嚟講係亦師亦友。當然我地都會同佢分享開心既事，而佢都會喺心中替我地高興。我之前有一段時間變得非常失落，但幸好劉sir開解我，如果唔係我都唔知點算。而我地班又問題多多，就連食飯時間都要為我地操心。就好似之前咁，我地班大混亂，有人會食錯飯又會有人破壞秩序......令到劉sir要每日都上嚟同我地食飯，睇住我地。仲記得有一次，有同學食咗我盒飯，得番個我討厭既飯盒。落去小食部問竟然冇得玩，唯有失望咁行番上嚟。我同劉sir講，佢打開飯盒一睇，覺得賣相不佳，而我又露出一副委屈既樣。劉sir唯有逼於無奈將大半飯餸都比晒我，當時我好多謝佢。而家唸返起，覺得自己好幸福，因為就算個老師點好都未試過將自己既飯比學生食，所以我覺得自己好好彩。同埋都冇老師肯用自己既食飯時間嚟陪學生，討論學生既問題。而劉sir又會時常播放電影比我地睇，希望值住部電影教導人生道理。仲有好多好多都講唔晒，所以當劉sir宣佈要離開依間學校後，個心簡直好似跌咗落嚟咁。我知無論我地點樣做，都無法改變依個鐵一般既事實(當然希望唔係啦)，所以我地要趁住依段時間嚟一個美好既回憶比劉sir。

劉sir，我地係永遠都唔會忘記你架！

我地會牢牢記住你既八字真言：

「錯就要認，打就企定！」