幾年前坐巴士曾經遇到一個情況，真係不得不同大家分享下！

■□■□■□■□■□■□■□■□■□■□■□■□■□■□■□

故事主人翁：一個約6歲大嘅小妹妹、一個中年爸爸

話說當日我同囡囡就坐喺一架過海巴士，當時巴士上已經好多人無咩位淨，

我同囡囡都要行到最後排先有兩個位坐，對面就坐住一對父女(故事主人翁)。

當架巴士去到港島入紅隧前最後一個站時，有勁多人上車，其中一位就係老婆婆，

佢不停咁行入車尾位置搵位企，見到咁嘅情況，

囡囡二話不說由自己個位企咗起身，再向婆婆示意比個位佢坐；

而佢自己呢... 就好唔客氣咁跳上嚟坐我大脾囉！

（阿女你其實都已經7歲架喇，咁跳上嚟你媽我會跛架！）

喺哩個時候故事主人翁小妹妹就開聲同佢身旁嘅中年爸爸講。。。

小妹妹：「爸爸你睇下，姐姐要人抱呀！」（佢指我個囡要我抱）

中年爸爸：「係因為姐姐讓咗個位比婆婆坐，所以先要佢媽媽抱咋！」

小妹妹：「做咩要比個位婆婆坐呀？」

中年爸爸：「因為婆婆係老人家，佢企唔穩架！一開車佢就會好易跌倒，所以咪要比個位佢坐囉！不如你都讓個位比人坐等爸爸抱你坐丫？」

小妹妹發哂脾氣咁講：「唔讓呀！咁多人坐定定點解要我起身喎！婆婆跌倒咪坐輪椅囉！以後唔洗企添啦！」

中年爸爸：「哈哈哈哈。。。」

（我聽到真係覺得好驚訝呢.... 點會估到一個小朋友會講D咁嘅嘢！

最好嘢都仲係佢爸爸，仲笑得出。。。 ）

■□■□■□■□■□■□■□■□■□■□■□■□■□■□■□

事後我問番囡囡點解佢會起身比婆婆坐，

佢答我：「爸爸媽媽你哋都成日起身比位老人家坐架啦！今次比我見到先過你，所以我起身讓坐先囉！」

聽到哩番話，令我深深感受到<身教>嘅重要性！

小朋友就好似一部影印機咁！

佢哋見到家長點做，佢就會跟住點做；家長發出D咩信訊，佢哋就接收D咩。

正所謂比佢哋親眼見到多幾次，勝過你同佢講一百次！