襯囡囡復活節假期結束之前，同佢去海洋公園癲番日 (出唔到國玩唯有喺香港玩啦！)

去海洋公園又真係點可以唔過覽車呢。。。坐覽車又點可以唔影相呢 (唔知幾時開始坐覽車自拍已經係指定動作)

○●○●○●○●○●○●○●○●○●○●○●○●○●○●○●○●○●○●○●○●○●○●○●○●○●○●○●○●○●○●

講到出國玩，好記得囡囡讀幼稚園K.3時曾經同我哋咁樣講過。。。

囡：「爹爹媽媽，聖誕節時Cindy爸爸媽媽帶咗佢搭飛機去日本玩呀！佢話好好玩呀！我都好想去呀！」

爹：「有咩咁好玩呀？」

囡：「Cindy話嗰度有雪睇囉！」

我：「雪。好多地方都有架喎！唔一定要去日本架！仲有咩令你想去日本呢？」

囡：「因為Cindy去過囉。。。」

我：「哈哈，你個傻妹！人哋去過你就想去，咁易比人影響架咩？！媽媽知你好羨慕其他小朋友可以搭飛機，但你要知道，我哋家並唔係一個咩大富大貴家庭，無可能afford到好似人哋咁年年去旅行，但爹爹媽媽答應你，喺你6歲入小學之前我哋一定會同你搭飛機去旅行。」

囡：「YEAH~!!!」

爹：「但係咁喎，你都要為去旅行出一分力架喎，你得唔得到先？」

囡：「我得架！我得架！」

我：「好！咁今日開始你就要乖乖地做一個好孩子、做個好學生，做好應該做嘅本份，如果做得唔好、唔聽話、唔守規矩、唔合作就無得去架喇！」

囡：「無問題！」

爹：「記得。。。唔可以naughty呀！唔係就無得去架喇！」

囡：「Yes Sir！」

○●○●○●○●○●○●○●○●○●○●○●○●○●○●○●○●○●○●○●○●○●○●○●○●○●○●○●○●○●○●

唔知大家第一次帶小朋友搭飛機時佢哋係幾多歲呢？

我自己就等到囡囡6歲(入小學前)先第一次帶佢搭飛機出國既。

原因好簡單，係因為我覺得太細個同佢出國，佢根本未懂事亦唔會有深刻印象，再加上太細個身體狀況都唔適合外遊，亦可以藉此令佢知道一個道理... <NO PAIN, NO GAIN>，有付出先會有收穫，無嘢係必要嘅！

最重要係。。。邊得嚟咁多錢細細個就帶佢去玩丫！