就到年底，又係發牢騷既好時候。

　　年頭話過09年係一個新開始，結果開始係開始左，只不過係惡夢既開始囉。

　　獨男既身份亦都走到第十九個年頭，個人開始頂唔住愈積愈大既孤獨感。發覺哩一年所進行既活動，一半都係同同性朋友玩，另一半就自己一個人行街，買野，同異性進行既活動極少。唔通我身上陽剛氣咁重就係哩個原因？

　　每次單獨咁出街都會比十萬個理由自己獨行既種種好處 "睇野唔洗就人" "唔怕有冷場" "唔洗顧人地感受" "可以自己安排哂全部行程"。其實諗咁多優點出黎都係自欺欺人，只需要一個獨行帶來既孤獨感就將所有優點蓋過。

　　桃花運程方面幾乎係無，成年都未有邊個女仔同我過到電，睇怕都無女仔比我吸引到。唔通我塊面鑿住"異性隔絕"？身邊拍緊拖既朋友仔，成日講羨慕我單身，我聽起黎只覺得係一陣陣嘲笑，好似暗串緊我"你條傻仔，做死一世獨男啦∼"

　　上天有意定無意，連返緊份工都無形中恥笑我。因為黎食糖水既客人大部份都係情侶，多數都係手拖手咁走入黎，肩並肩咁坐低，仲要係我幫佢地落單果陣耍下花窗。每次睇到哩種情境，總會情不自禁地暗嘆一聲，點解人地連食糖水都可以甜到漏，自己就睇到酸溜溜。

　　如果依家有女神般既人出現係面前，真係唔介意做人地觀音兵，甚至係狗公。

　　最弊係唔知女神幾時先而出現！連狗公都做唔成。