昨日放工後如常到柒拾壹門前等候小巴，忽然有幾聲怪響在身後上方傳來，初時我不以為然。結果證明我太大意了。

　　一粒黃色的塑膠子彈從柒拾壹上方的屋村平台射出，準確地擊中我的背部。一陣疼痛感驟然襲來，剎那間，恍然大悟，我成為槍手狙擊目標！剛剛那數下怪聲就是槍聲！

　　基於本能反應，我在最短時間內，衝回有屋頂掩護的地方。同時檢查背脊傷勢，還好我皮粗肉厚，只是腫了一小块，很快就不疼不痒。

　　有謂明槍易擋，暗箭難防，我平生最討厭那些躲在暗處傷人的鼠輩。這根本是膽小怕事的表現，為什麼有勇氣去做，卻沒有勇氣承認？套用一句網路流行用語"又要威，又要戴頭盔"完全是這班鼠畜的寫照。想用玩具槍射我，行！只要光明正大地地現身射擊，我扮演個移動槍靶又如何？大不了我又搞把手槍，來一場槍戰吧。

　　不過我也應慶幸這次射我的是小孩(這種十多元一把的垃圾玩具槍，只有小孩才會買)，如果換作大人，一個有心拿路人作試槍的槍械狂的話，配上一把充滿汽並填裝鋼珠的汽槍，足以在近距離內把人射出血來，傷口腫足半個月。換作職業殺手的話，我早就一命嗚呼了。

　　世界真細小，中七既同學竟然做左同事，無耐又黎多個校友同事，雖然兩位都已經無再做。但係同佢地返工果時，感覺好似返返讀書時期咁，真係令人懷念啊。

　　屋企部PS3除左強迫人買正版之外，佢既獎杯系統同XBOX360既成就系統一樣，令人又愛又恨。佢將一隻遊戲耐玩性大大延長(應該係拖延)，對於一D完美主義者(我都係其中之一)，或者係遊戲狂，哩個系統無疑係獲得自重感既最佳舞台，可惜，身邊既朋友無個有PS3，就算拎夠100個白金獎杯，都唔知比邊個睇。

　　好多人話我肥左。咁又難怪既，夜晚收工收得咁夜，令人好想食宵夜，慘在次次都忍唔到口，走左去食，有時一餐宵夜仲貴過晚餐，咁樣食法，果日返工真係接近白做。返工果時成日有突發事件令到有糖水多出黎，咁既情況通常都係我做甜品終結者，日日一餐甜品，日卡路里攝取量不斷暴增。最致命既係成個月都無做過運動，身體熱量無渠道宣洩，自然積聚係身體。

　　運動方面，個人唔中意有身體衝撞成份既運動，所以最多朋友玩既足球，籃球都同我絕緣。網球，羽毛球，乒乓球，單車哩家野雖然係心頭好，不過衰在難搵到朋友一齊玩，無理由一個人去玩D雙人運動(諗下有條友仔對住道牆打網球，等佢反彈再打返去，不斷重複……)

　　發現公司有女同事個樣同某電子遊戲入面既女主角個樣有8成相似，可惜只限係果位女同事減肥同增高後再比多少少想像力先似勒。

　　有新黎同事話我個樣似廿歲。哩個歲數誤差只係1，已經令人振奮。比著高考最激烈果期，我個樣可能突破30，成個亭亭玉立既麻甩佬咁樣。 

　　成日有人話，人生如果無目標，同條鹹魚有乜分別？

　　我就覺得我依家同條鹹魚無分別。

　　有咩方法可以令我唔洗再做鹹魚？

　　即使做條小魚都好啊。

　　就到年底，又係發牢騷既好時候。

　　年頭話過09年係一個新開始，結果開始係開始左，只不過係惡夢既開始囉。

　　獨男既身份亦都走到第十九個年頭，個人開始頂唔住愈積愈大既孤獨感。發覺哩一年所進行既活動，一半都係同同性朋友玩，另一半就自己一個人行街，買野，同異性進行既活動極少。唔通我身上陽剛氣咁重就係哩個原因？

　　每次單獨咁出街都會比十萬個理由自己獨行既種種好處 "睇野唔洗就人" "唔怕有冷場" "唔洗顧人地感受" "可以自己安排哂全部行程"。其實諗咁多優點出黎都係自欺欺人，只需要一個獨行帶來既孤獨感就將所有優點蓋過。

　　桃花運程方面幾乎係無，成年都未有邊個女仔同我過到電，睇怕都無女仔比我吸引到。唔通我塊面鑿住"異性隔絕"？身邊拍緊拖既朋友仔，成日講羨慕我單身，我聽起黎只覺得係一陣陣嘲笑，好似暗串緊我"你條傻仔，做死一世獨男啦∼"

　　上天有意定無意，連返緊份工都無形中恥笑我。因為黎食糖水既客人大部份都係情侶，多數都係手拖手咁走入黎，肩並肩咁坐低，仲要係我幫佢地落單果陣耍下花窗。每次睇到哩種情境，總會情不自禁地暗嘆一聲，點解人地連食糖水都可以甜到漏，自己就睇到酸溜溜。

　　如果依家有女神般既人出現係面前，真係唔介意做人地觀音兵，甚至係狗公。

　　最弊係唔知女神幾時先而出現！連狗公都做唔成。

用自己所有財產黎買一樣野係好不智既行為

但偏偏我就成日咁做

繼上個月用左成份糧既錢黎買對電腦喇叭後，今個月用左成份糧黎買部PS3

你話瘋唔瘋狂，癲唔癲喪？

不過，裝完部機，一到開機畫面果下，我覺得，哩三千幾蚊係絕對值得比。