前幾日上左去YES度做左份傳說中要做2個鐘既職業導向測驗,據聞一共有5份測驗,但係我果部機只得4份,仲有一份唔通要打秘技先肯現身?

  2個鐘時間比多我,D測驗問題的確多,不過唔需要咁多時間黎做,半個鐘多D就做哂。

  有一份既結果講我將來適合既職業:社工,護士,警察,教師,客戶服務主任,導遊

  除左護士同客戶服務主任之外,其餘職業都有考慮過

  睇黎個測驗並非浪得虛名。

係屋企悶得地老天荒,為免無所事事,又唔想又太大支出,所以揀左去圖書館泡一個下午

今次去到聯和墟圖書館終於唔係為左入佢個自修室,(雖然果個自修室對我對講無用)

係自修室出面行過見到一眾莘莘學子埋首苦讀,諗到佢地係下一批香港教育既犧牲者,都不禁搖頭嘆息

加油吧,年青人!

一個經歷完2次公開試的人,絕對有講風涼說話既權利,如果連哩點都無埋,咁讀書豈不是太悲哀?

圖書館雖然大,但係適合我既書始終唔多,如果可以增加多d我中意既類別就好(太自我中心勒)

加上考完試後,對一切歷史,語文,文化類書籍有強烈反感,我諗係試前服用太多既副作用

今次去到,除左小說之外,都唔知仲有乜書好借

最後就係現場睇左本衛斯理,再借埋六本古龍就閃人

下次再去既話,希望可以借埋其他類別既圖書

29日返學校拎一大堆紙,包括離校證書,成績表,雜亂獎章同幾本小冊子咁

返到學校,竟然要上7樓先有得拎,入到課室先知道D紙一早放哂係各個桌上

等同學返黎自己拎完就走,連老師都唔洗係課室留守

唔通成哥真係咁唔想見返我地?哈哈

其實哩日都咩動力返,如果唔係為張中七離校證書(讀多年半書就係為左張野),返去真係腳骨力都哂埋

張成績表?就算考第30名,第1名,都無分別,對我黎講只會廢紙一張

30日後張紙先至係重要

當然,問心既話,如果成績表寫住名次30,30日後果張紙都唔洗有太大期望

好不幸,我對30日後張紙都無咩期望

下午,為左一洗頹青既面貌,約左好友去打羽毛球

席間傾到好多唔同既事,大家近幾年點,遇到咩事,真係講人事是非無之外乜都講齊

寫BLOG既目標係咩?

果時我話梗係為左異性,但係返到屋企慢慢諗,又唔係啵

我哩度第一篇BLOG已經唔係為左寫比異性睇

只係想搵一個地方記低某時某地我所諗既事,將來睇返過去既成長經過

當然,有部份時期寫BLOG係寫比異性睇,希望佢地對我有多D了解,大家亦都多D話題可以講

甚至可以為一個人不斷咁寫寫寫....

但係到依家,我再次回復返最初寫BLOG既本意

所以你見到我打文用返口語,唔打書面語

咁樣就可以保證我將諗到既野唔經修飾,直接打出黎

你睇到既我,比以往更真

人無聊起上黎,可以乜都搞一餐

早排夜晚遲瞓,可以太攰關係,訓著無耐就發個左個惡夢

都成年幾未試過發惡夢軋醒

早幾次半夜驚醒之後,瞓唔返就當然架勒

又唔想眼望天花板發呆,通常都會揀打機打到天光,等到攰時再上返床瞓過

但係今次見半夜醒,玩電腦又似乎太單調

眼見頭先個惡夢仲記憶猶新,心又有餘悸,再瞓只會發多個惡夢

索性攝高枕頭,分析下頭先個惡夢有咩犯駁同唔合邏輯既地方

諗下諗下又搵到5,6個唔合理之處

最後仲無聊到玩結案陳詞,證明比自己睇所有野都係假既,唔洗再嚇自己

一個青少年發個夢都可以做D咁無聊既事

都係因為無工作,無節目,無目標,無金錢既關係

又到左5月尾

考完整個AL已經半個月,當初話要搵工既雄心壯志仍未酬

去過幾個招聘會,全部都係例牌答案,先生你可以走得,我地如果決定錄用你既話,會係3至7日內打電話比你

咁既答法咪姐係叫你返屋企慳返啖氣

最搵笨既係青衣個招聘會

無錯,賣行哂報紙,話勞工處搞大型招聘會係有助宣傳勞工處係有做野既訊息

但係揚得咁大,搞到中五畢完業既後生仔未夠18歲又出哂黎排隊學人搵工

中七,真正有需要既人就要同佢地一齊迫餐死

好勒,排完3個幾鐘既隊,以為入到會場有得面試勒

點鬼知去見5份工,5份工都係叫人填完佢地張表就走得人

完全對求職者唔尊重

所以話呢,咁既時勢,搵到一份工作真係好需要運氣