話說依家返緊哩份兼到無得再兼既兼職，工作內容固然係悶，但係我都可以講，過去三個幾月已經令我眼界大開，尤其明白到有Ｄ女仔，即使窮我一生之力，都無可能追到。

　　事關個女店長有幾分姿色，屬於果種係雄性生物都想望多兩眼既人，就係咁，每日都有一大班狂蜂浪蝶美其名走黎食餐後甜品，實質就為左昅女。證據就係佢地對淫眼總帶幾分賊光，每當店長係面前行過，就好似渣古上身咁，對眼有自動追縱功能，可以頭不動下眼珠左右橫移。每當見到哩種神技除左驚嘆交加外，都想大聲同佢地講”係男人既，就光明正大咁望啦！”

　　如果桃花運可以用數值量度的話，店長既運程肯定係100。因為我咁大個人，第一次見到有人係可以係情人節可以收到差唔多十束花，平均一星期增加一個追求者。即使班男人知道佢有男朋友，仍然死纏爛打，無時無刻強調自己係最佳替補一樣。不過哩班男人都唔講得笑，個個都相當有條件，講下佢地既共通點。

一：有車，寶馬，賓士已經係標準牌子，CHEAP D既，本田都比你過骨勒，如果踩架單車黎就當自己係車主，我諗店長眼尾都唔望下。

二：有錢，唔係個個都大富大貴，但係當中比較窮既，都起碼有份有穩定收入既職業，換句話講，學生立禁。

三：奇招盡出：為左令店長留下深刻印象，班男人真係絞盡腦汁；有個警察一睇準幾點落雨，即刻揸車過黎店舖，就係為左比把遮店長，怕佢淋濕喎；仲有就係次次黎都食同一樣野，不過哩招大多人用，搞到我都幫班人改名做楊支甘露人...糖不甩人...

　　其實做得佢男朋友，我想像到佢每日都提心吊膽，怕會比到位其他人有機可乘，一個咁多人追既女仔，要管束得好，根本係無可能。拍拖拍成咁，都咪話唔辛苦。

　　總之呢，多謝哩個店長，令我次次返工都好似睇緊”精裝追女仔”真人版，仲要永無悶場，使我平白既自修生生活添上幾分色彩。