Demon’s souls 惡魔之魂玩後感

前言：

　　舊年買完PS3，第一隻爆，同第一個攞到白金獎盃嘅遊戲就係佢——Demon’s souls，亦都係佢，令我無後悔到當時用成份兼職的人工去買遊戲機。玩哩隻遊戲，嘅係享受又係折磨。不過有一點可以肯定，只要你拎起手掣，就唔捨得再放低，下次手掣離開手掌只有兩種可能，第一：終於玩到攰。第二：嬲到將手掣摔落地。究竟點解Demon’s soul's可以令玩家愛恨交纏？又點解會話Demon’s soul's激起潛伏我地體內嘅M男情意結？

故事：

　　故事發生係歐洲中世紀，有條友仔唔知做乜喚醒左遠古野獸，隻野獸就不斷以人類靈魂為食糧，強化自已之餘仲帶埋手下班異獸到人類領地搞搞震，令到一個叫波雷塔利亞嘅王國幾乎玩完。而主角當然係唔怕死咁走去波雷塔利亞，誓要拯救蒼生咁話喎，而故事就係咁開始……

遊戲內其中一隻大Boss

　　詳細故事情節煩請去官網睇。(我認我懶)

　　隻遊戲對劇情處理同其他RPG比有好大分別，基本上玩家可以一路殺到底而唔理劇情，而劇情對遊戲只係起到襯托作用而非推動遊戲發展本身。

　　之不過唔係話Demon’s souls的劇情簿弱，而係玩家從遊戲中各樣伏線，契子，暗示性細節及NPC嘅對話中所領略到嘅，絕對大過遊戲劇情嘅表述。例如當玩家在第五章的嘔心貧民區沼澤好不容易殺到底，竟然發現那個純潔的第六聖女才是貧民眾的首領，正當玩家狠下心腸親手解決聖女，聖女不但無還手，仲甘願自殺，交出靈魂。任何人都諗到唔到果關嘅終BOSS竟然用咁嘅手段結束自己。即使係最污穢不堪的地區都有最神聖的靈魂存在，手刃聖女的玩家究竟是正是邪？

　　我係網上見到篇文章好詳細咁剖析成隻遊戲每一個細節，由世界觀，宗教觀，武器防具考證到遊戲內所有暗示性劇情都仲一解構，講得好有道理之餘仲令讀者學到唔少關於歐洲中世紀嘅歷史知識，文章質素堪比大學論文。推薦俾爆左機，又想了解多啲劇情嘅朋友欣賞。

點擊我

評分：85/100

畫面：

　　遊戲畫面相比起同樣係09年推出嘅Killzone2,Uncheated2,Biohazard5仍然有一段距離，當然同上述三隻以當時頂級技術製作的遊戲作比較，係有啲嚴苛。

若單論遊戲畫面嘅表現，至少係光影，紋理貼圖上都對得起高清平台。而係氣氛烘托，環境佈置上都有相當唔錯的表現，容易令玩家代入中古時期的歐洲。

王城結構精細，反映製作團隊下了不少功夫

　　畫面風格上，主要走兩種路線，第一種係冷暖色調，例如第一章用嚟提升王城威嚴，第四章製造暴風嘅感覺；第二種係暗黑路線，玩家係高暗度的地牢亦步亦趨地探索，提防有小卒從暗位突然撲出，成功營造壓迫感，令人玩得難以喘氣，這種分明的畫面風格值得稱讚。

王城的巨大騎士

壓抑暗黑風格

評分：90/100

聲音：

　　音效恰如其分地襯托到遊戲氣氛。玩家行走時清楚嘅盔甲碰撞聲，弓箭發射嘅呼嘯聲係我認為歷嚟咁多隻ARPG中最真實的，而斬怪聲聽起嚟更刀刀入肉，令玩者斬到停唔到手，倍增戰斗爽快感。

　　Demon’s souls嘅背景音樂少得出奇，成個遊戲大約只有廿幾首音樂，原聲碟只係用一隻CD就裝得哂。而果廿幾首音樂主要用係BOSS戰同登入/死亡畫面，所以平常係關卡中探險時靜得恐怖。唔知原因係製作團隊唔夠資源去創作更加音樂，定係有意係BOSS戰先有音樂聽。

　　中國畫中有種技巧叫留白，即係特登係幅畫度留空一大片，令幅畫睇落更有意境，係一種大師先運用得好嘅技巧。如果Demon’s souls真係將留白用係遊戲音樂上，只可以話佢用得好出色。原本已經陰森嘅畫面再加上無聲沉寂，構成一種詭異氣氛。當玩家幾經辛苦殺到去BOSS戰場景，音樂終於劃破大戰前嘅寧靜，伴隨著重節奏音符，玩家心跳同步加速，將緊張感升至頂點。

　　背景音樂最大特色係類彌撒曲風。即係氣勢磅礡嘅主旋律中，有人聲不斷和音。上面我推薦過果篇分析文章指出過，哩種曲風同遊戲內嘅宗教主題有好大關係，詳細就睇佢篇文章。

　　令我印象最深刻嘅背景音樂莫過於打第六聖女時響起的哀歌，一別於之前幾關嘅雄壯音樂，聖女之樂缺少左燃起玩家情緒的激情，多左分令人沉思嘅節奏。可謂恰到好處咁表達出劇情中所有觀念在那刻激盪交纏。當時為左聽多首音樂幾次，特登用S/L大法重玩果關，即使依家聽返，首音樂仍然係全遊戲最好聽嘅聲音。

評分：85/100

系統：

　　Demon’s souls嘅精粹盡在其系統。令人一講起Demon’s souls就諗到佢獨特嘅系統。

難度設定

　　用一個字嚟形容Demon’s souls，一定係”難”。

　　未買Demon’s souls前，已經聽人話哩隻遊戲難到唔似樣，有人仲因為難得滯而極速放返隻Game。當我入到教學關卡，遇到幾隻雜兵，比我三兩刀就ko果陣，仲心諗”有幾難啊？都不外如是姐”當我進入到第一章，玩左三個鐘後，我徹底認同咁多位嘅睇法……

　　點難法呢？第一要講下遊戲中的靈魂系統。玩家係遊戲內，打死怪物後，會得到一定數量的”魂”，魂可以用黎提升角色能力，亦都可以同魂同NPC買物品(Demon’s souls中魂即是金錢)。可惡嘅係當玩家死亡後，所以魂即時喪失，係死亡地點會留底灘血，重生嘅角色要去返灘血度先可以拎返所有魂，重生後角色血量上限只有正常情況一半，而關卡所有怪物亦會重生，所以想拎返喪失左的魂，難度倍升，最殘酷的設定係，當玩家係未拎返魂之下再度死亡，舊有血跡會消失，係新死亡地點留低新血跡。即係話可能有100萬魂因此而永遠消失，之前的努力完全白費。

　　第二就係關卡內無處不在的陷阱，Demon’s souls內幾乎每個轉角位，暗角，視角盲點都潛藏住敵人，等玩家經過時給與致命一擊。而場地陷阱方面亦相當可惡，例如會突然斷裂嘅高架橋，忽然下陷嘅屋頂或者係會有大石滾下的小徑，令無數玩家一次又一次咁爆粗。

　　兵卒比大佬強係Demon’s souls的特殊現像。我統計過，自己死係卒仔手上比死係BOSS手上多成十倍，遊戲初期比幾隻兵仔圍住已經必死無疑，去到後期更出現一隻能夠一棍扳死玩家嘅敵人，所以係Demon’s souls內，所有敵人都有BOSS級實力，令玩家一步一驚心。

　　既然Demon’s soul難成咁，點解仲話佢好玩呢？弔詭的地方就係遊戲好成功地挑起玩家們嘅唔服輸心理同挑戰慾，愈死愈想過關，尤其係每一關所有怪物同陷阱都係定點出現，只要死多幾次，就對所有難點瞭如指掌，直到玩家斬殺關卡BOSS後，先發現原來已經有咁大進步，就會覺得所有挫折都值得。過關的甜美俾到玩家堅持落去嘅動力，當玩家進入下一個章節之時，又再度陷入上述循環之中……

角色去到700級都仲會比怪物秒殺

靈魂傾向系統

　　初頭見到哩個介面都唔知係咩黎，而整個一週目我都無理過佢。直到第二週目開始攻略白金獎盃先至開始有接觸。去到第四週目先完全掌握到系統玩法。由於實在太複雜，所以不作介紹啦。

　　對於想拎白金獎盃嘅朋友，強烈建議用離線模式遊玩，咁樣就易拎到道具好多。

　　希望Demon’s souls續作能夠簡化或者更換整個系統，哩個實在太不人性化。

複雜嘅靈魂傾向系統

連線合作/敵對

　　遊戲時如果覺得關卡實在太難，可以召喚玩家黎一齊攻關，叫埋三五知已挑戰巨BOSS更是痛快。

　　Demon’s souls內亦可以做邪惡角色，入侵其他玩家的遊戲。如果成功擊殺對方，仲有相當唔錯的獎勵。不過因為咁，好多人一見有玩家入侵，即刻消極咁拔網線，令入侵者無癮。

　　無論幫人定係入侵人，都有等級限制，玩家唔可以同等級差距大過10既其他玩家連線。因為我利用遊戲BUG將角色升到712級，搞到無人同到我連線。唯有好孤獨咁攻略白金獎盃。

　　所以奉勸各位唔好隨便用BUG。

評分：95/100

耐玩度：

　　Demon’s souls一共只有五章，關卡算係偏少，不過係難度頗高情況下，玩家攻克一個陌生章節，大概要兩，三個鐘，一章落黎，死亡次數超過100都屬正常。一週目時間通常廿個鐘左右。而二週目開始，怪物實力就會大幅強化，每過一週目，怪物會強化一次，理論上怪物可以無限強化，而玩家本身能力就有上限。不過經過一週目嘅洗禮，所有玩家都會清楚哂每一關嘅陷阱，怪物埋伏位置，被陰死機會大減。所以我第四週目用4個鐘就爆機。可見遊戲流程實在偏短。

白金之路

　　想追求白金獎盃的話，遊戲時間又再延長幾十個鐘。最難拎嘅獎盃睇怕係要用刃石改造武器果個，為左粒純粹刃石，玩家要不斷重覆打一隻掉寶率奇低嘅黑色骷髏。好運的話，兩三粒鐘就打得出，人品差起上黎，打一個星期唔掉都唔係奇事。我就屬於人品中等，運氣平凡，打左兩日就出左，算係咁。

辛苦左大半個月嘅成果

評分：85/100

總結：

優

I. 具挑戰性

II.另類RPG風格

III.中古歐洲魔幻氣氛濃厚

缺

I.極難，容易令玩家氣餒

II.防具，盾牌略嫌不足

推薦玩家群：挑戰自我型、劍與魔法愛好者、動作遊戲高手，M男

不推薦玩家群：神經過敏型，躁狂症玩家，優閑型玩家

總評分：90/100