分類︰日常生活
今日肥泰打電話比我,問我有冇工可以介紹比佢做
我如實咁答佢,我依家投閒置散咁坐係屋企睇書,唔洗望我有咩好消息比你
於是我地就結束左搵工哩個話題,轉傾其他野,但係肥泰仍然係對話中叫我幫佢留意下有乜工岩佢做
我勉為其難咁答應左.
----------------------------------------------------------------------
講起電話,發現我每個月既用量都好難超過200分鐘,
歸根究底,可能我係一個沉默既人,平時返學人地唔撩我講野,我都唔會出動出聲,
但係當發現大家既興趣,話題岩傾之後,就好熱情咁搵佢地,雞啄唔斷.
明顯既例子就係青王,雖然我同佢既性格可謂天壤之別,不過我地有個共同既嚐好
---------ACG--------->Animation,Comic and Game
大約由中五開左學冇耐,我先認識佢,雖然已經同佢同班左一年,中四我只係知佢個名.....
佢比我印象就係...日復一日,週而復始咁比人蝦,比人玩,比人整蠱(某日按:明日復明日,明日何其多阿!)
每當見佢比一大班同學圍住黎玩果時,我心入面既正義感不自覺地燃燒,有一股幫佢解圍既衝動
奈何對方人多勢眾,我方孤軍作戰,硬碰硬無疑係以卵擊石,係利害相衡之下,
我通常選擇倒戈相向,可謂人不為己,天硃地滅呀(<----這話是學自一位很要好的朋友)
就這樣,青王就過住痛苦難熬的會考生活.
----------------------------------------------------------------------
形容到青王有著咁傳奇既中學生活,很難想像到我係點樣同佢交住,事實上我都唔係咁記得
不過印象中,係中五頭,我係轉堂時候見到青王向其他同學推銷緊一本書,我係好奇心驅使之下
竟然走去問佢拎左黎睇,(哩一睇亦非同小可,對我以後的發展有好深既關係)
本書叫《灼眼的夏娜》,屬於輕小說,即讀者群主要為十至二十多歲既學生.
我愈睇愈覺有趣,於是我同佢開始熟絡起黎.
回顧成個中五生崖,青王將我由一個只會睇亞洲週刊既悶人,變成一個有少許御宅傾向既正常年青人
通過佢,我開始接觸到大量既漫畫,亦都開始觀看動畫(以前我腦中既動畫係叮噹,小飛俠,蠟筆小新果類...)
慢慢咁,我開始對日本流行文化有最初步既了解,亦都開始留意日本這個常被中國人刻意輕視既國家
亦都因為咁,我會考歷史科論述題都揀左日本黎答(<-----這....未免有點牽強)
無論如何,雖然篇blog不斷提及青王,但其實我想表達既事,同佢一d關係都冇....
希望明眼人會睇得出我想講乜
----------------------------------------------------------------------
P.S.說一說,笑一笑,叫一叫,世界更美妙
Title●!? 
Date ●31-07-2007 
