尋晚瞓得幾好
所以今日都唔係太眼瞓
今日 Shanice 帶咗一底蘿蔔糕同一底馬蹄糕返嚟俾我哋食
一早又食到好飽喇
再喺咁落去
我真係會變做一個肥仔
唔知點解尋晚老豆幫我整到個飯盒咁大
搞到我晏晝又食到好飽
仲食埋生果
下晝簡直係眼瞓到想死呀
救命啦啦啦啦
今日發現原來 Shanice 唔鐘意 Eric
佢講句句嘢都有骨咁
放工一個人去 988 食咗啲嘢就去做尖
都幾多人
十點幾就返屋企喇
今日聽 ipod 時都係聽住張惠妹
聽咗三十七隻歌
講真真係全部都好聽喎
但係有啲歌好似窒窒哋咁
點解會咁架？？？

今日仍然係好凍
今日朝早主要係 Set 房
同埋跟番 Eric 啲手尾
執番好啲文具同 Equipments
今日 Terence 帶咗年糕返嚟俾我哋食
但係係冇煎過架喎
寧姐用微波爐叮番啲年糕
叮完第一次仲係好硬
搞到我同 Phoebe
食咗一啖即刻吐番出嚟
我哋話好似食緊勞工梘咁
叮完第二次再食
好食好多
好軟好似蜜牙糖咁
超搞笑
另外 Jessica 仲拎咗蘿蔔糕返嚟俾我哋食
所以今朝一返工又食到好飽
食晏時去咗銀行入利是錢
每次入完錢都會覺得好滿足架
今日下晝都無所事事
放工同湯米去咗東區蘇豪食嘢
慶祝我哋拍拖第二十個月紀念日
去咗一間叫 Chit Chat 的西餐廳
有前菜、湯、麫包、主菜同飲品
埋單四百幾蚊
因為湯米有 Coupon
所以最後只要二百幾蚊就得喇
呢晚真係好凍呀
喺海邊就更加大風
食完飯行去巴士站時見到有個電影資料館
見仲開緊門就入去睇吓
入面有一啲電影介紹
我好鐘意入面個環境
如果可以喺呢啲環境返工就好喇
跟住因為我太眼瞓同太攰
所以湯米話同我返屋企喇

今日湯米收到傻一送俾佢的禮物
好似好開心咁
係就好喇
湯米送咗張惠妹隻 5CDs 精選俾傻一
我好想要架
因為呢個係限量特別版
普通版只係得兩隻 CDs 架咋
同埋特別版只係得台灣版
香港啲唱片鋪好難搵到
嘻嘻
湯米仲送咗個新 earphone 俾傻一
傻一返到屋企就將 A-mei 啲 CDs 轉做 MP3
執執吓嘢發現原來之前湯米送俾我嗰條白色 earphone
係有一條長線架
跟住又覺得要湯米嘥錢買過條新咁
下次真係唔好咁浪費先得

今日返工好眼瞓呀
不過其實都冇乜邊日唔眼瞓啦
呢兩日都瞓得好差
有時都唔知係發緊夢
定係半夢半醒
有時又俾大佬啲鼻寒聲嘈醒
跟住又好耐先瞓得番
真係好想揼佢呀呀呀
今日返工好快就清晒手頭上啲工作
又可以做吓功課
放工去咗魚旦大王食咗雙丸河
跟住就返學喇
今日返學簡直悶到痴線
又超眼瞓
放學仲要留低傾功課
仲要傾到十點半
個腦完全係轉唔到
放學時凍到傻咗
我一路等巴士
一路喺度震
救命
原來湯米今晚完咗個 Course 過嚟等我放學
可惜我冇同佢講我要傾功課
我又 miss 咗佢三個電話
就係咁
湯米呆等咗九個字喺度食風
最後湯米等唔到我走咗喇
今晚臨返屋企前去咗麥記
買咗兩個飽食
因為實在太凍同埋好肚餓
跟住九秒九跑返屋企
返到去食完嘢沖埋涼
跟住就寫咭同整禮物
差唔多一點半先瞓
好攰啦啦啦

今日公司啲同事喺度討論 Eric 走的原因
因為大家都覺得佢走得太突然
Terence 覺得係 Shanice 迫 Eric 自己辭職
同埋認為佢應該仲未搵到工
Phoebe 就覺得 Eric 同我哋講佢唔做時個樣好怪
同埋冇理由只係賠千幾蚊咁少
但係點都好啦
人都走咗
估嚟都冇意思
呢件事令我覺得呢個部門好恐怖
有時真係唔知邊個係人
邊個係鬼
好似冇一個人信得過咁

今日放工自己一個去做尖
跳 BS(1)
跟住去買禮物俾湯米
因為星期三就係我哋拍拖第二十個月的紀念日喇
首先我去咗 ICE FIRE
買咗四條手戴的飾物
有兩個款
每款兩條
我同湯米每人一款一條
因為見湯米有條手帶都爛喇
俾錢時諗住碌卡或者用 EPS
但係個 Sales 話佢哋部機個 3 字同 5 字個制都壞咗
我又唔夠 Cash 喎
搞到我要去銀行再返轉頭去俾錢
但係個 Sales 都好好禮貌
同埋又幾靚仔
算佢啦

之後去咗 K2 買咗一件 Polo Tee 俾湯米
我之前買咗件藍紅間
湯米話過都鐘意另外一件
係黑灰間
咁所以我就買咗佢喇
去到以前舊大丸間 K2
見到上次喺 Style House 撞過嗰兩個Sales
我覺得個女 Sales 好似阿嬌
原來佢哋會幾間鋪周圍走架喎
買完嘢終於任務完成返屋企

諗住返屋企附近間麥記買嘢食
但係地下嗰層封咗
地面又冇位喎
我又唔想買返屋企食
因為買返去食佢哋又會問長問短
最後只係返屋企食咗包薯片就算喇
勁肚餓

今晚拆咗利是喇
今年的成績係二千三百七十蚊
係最好的一年
好開心啦啦啦
我以為得千三四架咋
可能因為今年多咗人俾五十蚊呀

今日一點起咗身
爸爸同媽咪都冇出去飲茶喎
個個都喺度
今日同湯米去曬燈做尖同跳 BS(1)
今日跳咗十五分鐘就已經超攰
腳都唔想郁
出勁多汗
好熱
救命
又跟唔到
有時跳到仲要停一陣抖抖
今晚去咗食韓燒
好飽呀呀呀