今日返工一切回復正常

有好多嘢要做
但係好彩樣樣都唔趕
今日塊面又多咗暗瘡
前幾日仲好哋哋架喎
今日 PP3 條行人隧道啟用喇
以後行去 PP1 或者地鐵站會方便好多
條隧道仲有一啲鋪頭
有間賣三文治的鋪頭
有個識講廣東話的鬼仔
好鬼搞笑架
仲好靚仔添
放工同湯米去做尖
因為要趕住去跳 BS(1)
所以去做尖之前只係買咗麫包食
湯米同我都咁啱一齊買咗麪包俾大家
嘻嘻
今晚做完尖先去食飯
去咗食 KFC
聽晚要返學喇

呼！！！

今日準時十二點起身
雖然仲係好想瞓
但係我唔可以再要朱古力仔次次都等我
我話過新一年要改咗我遲到的習慣嘛
湯米今朝入咗大埔同佢屋企人飲茶
出番嚟兩點幾
佢一打嚟我正好出門口
時間啱啱好
嘻
我哋去咗越棧食嘢
跟住去咗 SunZone
個蠢女仔又搞錯嘢
唉
唔知間嘢係咪會執呢
連冷氣都唔開
都係快啲用晒啲 Coupons 佢先得
跟住去做尖
跳 BS(1)
比上次跳得好
因為專心同認真咗
做完尖就去行咗一陣
湯米喺 Izzue 買咗件 Tee 喇
哈哈
跟住行咗去糖街
好多賓賓
以後星期日都係唔好去嗰度喇
去咗潮苑食嘢
我食咗個坑腩魚片頭牛丸河
好飽呀
跟住就返屋企 lu
咁又過咗一個星期六日
真係唔想咁快又返工

尋晚未夠十二點就瞓咗
今日未夠十二點就醒咗
但係覺得瞓得好夠
今日約咗陳慧琳、陳慧蘭、大雄同問米婆
去尖咀朗庭食 Tea Buffet
周大雄個老婆都有嚟
陳慧蘭就帶咗穎怡出嚟
反而小晴就因為返咗大陸冇嚟
雖然小晴冇嚟
但係都俾咗個公仔佢阿姨
好似記得小晴係鐘意 Winnie The Pooh
(有錯唔該更正吖 Joy Lam！)
送咗個爽身粉拍拍掃俾穎怡
唔知穎怡有冇用開架

不過有多個替換都好吖
今日穎怡真係冇時停
搞到佢媽咪都食唔到嘢
同埋穎怡係一個唔乾淨的小朋友
乜都食
個 Tea Buffet 都幾多嘢食
好多甜品

唔錯呀
周大雄終於都唔著黑色衫
而且仲著咗件公仔衫
唔通好似佢哋講咁
大雄返番 CPD 之後真係變晒？？？
睇咗陳慧琳本婚紗相
真係好靚
但係有幾幅喺沙灘度影嘅好似 Key 兩個人上去個景度咁
好搞笑
我最鐘意就係有兩張好有泰國 Feel 嘅相
今日佢哋仲教咗我用新電話一個 Function
好勁呀
陳慧琳問我點解又會出呢部機
好彩我頭腦轉得快
話因為夠細囉
好在冇喺問米婆佢哋面前爆係湯米送的情人節禮物
夜晚同朱古力仔去咗行街
去信和搵安室隻 Tour DVD
竟然加到四百蚊
傻架
今晚又買咗件 Tee
真係好想買架

因為下星期好多同事都放完假返工
所以KiKi、Phoebe、Eric 同我決定盡情珍惜同利用埋今日
就係咁
今日返工都冇做過嘢
只係同佢哋傾偈
間唔中有同事嚟借書同攞 Cert.
同埋都有做吓功課
下晝我哋更加放肆
喺度賭廿一點
佢哋仲教我玩三公
真係覺得有點過份
哈哈
今日食晏去咗一間茶餐廰
食咗個五香肉丁餐肉炒飯
好好食呀呀呀
放工去咗銅鑼灣買咗啲嘢就返屋企喇
冇去到做尖
因為覺得好攰呀
返到屋企先知今晚冇煮飯
唯有自己落街買飯盒啦
突然間覺得自己好淒涼
傻傻哋

今日著咗件新冷衫返工
但係啲同事話好似阿伯著嗰啲冷衫咁
我又唔覺喎
我覺得幾好睇同好舒服呀
同埋朱古力仔都覺得好睇
你班女人真係唔識嘢呀

放工就返屋企喇
而湯米就去打波
湯米今日俾佢家姐同老豆激親
唔好咁勞氣啦
傻一氹番你啦啦啦