今個星期好閒 一個 Training 都冇 所以可以搭遲一班車返工 唔使咁趕 今日成朝都好多濕碎嘢做 但係忙完都唔知做過啲乜 下晝就好少少 總算抽到啲時間出嚟 做吓功課 睇咗啲 Cases 放工又係去食魚旦大王 跟住就返學 今晚紅隧竟然唔塞車喎 好快就返到學校喇 今晚要交 Group Assignment 但係我哋組份功課好似好求其咁 下個 Assignment 要認真啲做喇 放學就即刻返屋企喇
今日出門口返工時又係落住微微雨，最討厭就係呢啲天氣架喇，今日返到 PP3 時差啲又跣低，好彩有驚無險！今日一到九點就開始打電話訂 Sammi 演唱會飛，一路打一路打，手提電話同公司電話一齊打，一路打一路做嘢，打到十一點幾都打唔通，跟住就放棄唔打 lu，點知到十二點幾無心之下一打，竟然通咗有人聽，終於都訂到喇！ 今日 Jessica 放下晝，之後兩日都係，因為佢個女要考試，Lunch 同 Ada 、Phoebe 同埋 KiKi 去咗食車仔麫，呢個組合食晏係最舒服架，因為冇假面人喺度，下晝終於都要的起心肝去做嗰個 MS Powerpoint Producer，原來都冇想像中咁難，總算做咗四份一，明天要繼續！ 放工去咗高登配 Con，因為用晒喇，搞到今日返工要戴眼鏡，跟住再去埋找咭數，之後就返屋企喇！因為今個星期一冇 BS(1) 跳，原來都有兩個星期冇返屋企食飯喇，難得今日無線有全新三線劇集，同事三分親好好睇呀，關詠荷做戲真係好入屋，聽晚江欣燕出場喇，但係要返學冇得睇，片尾歌仲係關淑怡唱添，真係估唔到，之後亂世佳人個劇種就唔係咁啱我睇，但係有賣飛佛吳卓羲，佢個做型好似好傻仔咁，幾得意，宜家就睇緊寫意人生，時裝劇我鐘意，又有靚仔鄭嘉穎，好睇，三個劇集我都好想追，真係想晚晚都睇呀，一陣仲有向世界出發，我一定要睇梁詠琪嗰集呀！！！
今日去咗曬燈 今日個 Reception 女仔係之前未見過架 但係佢幾好禮貌同幾醒目 之後就去咗做尖 跳 BS(1) 跳到個小腿好攰 兩對腳好似唔係自己咁 沖完涼出嚟 Locker 時竟然跣低咗 瘀爆 今晚去咗麥記食嘢 收銀個細路好似發緊夢咁
我話喺度食 佢就反問番我係咪拎走 個朱古力新地又冇落花生喎 跟住以為佢會倒番啲花生落去 但係佢竟然整過杯俾我
正一死蠢
今日其實係知醒起身架 只不過係遲咗少少出門口 而等巴士又等咗四個字 搞到今日約咗同學傾功課又遲到 好彩我係第三個到 喺 Poly 個舊 Canteen 傾 傾到四點半就走喇 之後同湯米去咗尖東嗰邊食咗啲小食 有炸牛丸魚旦紅腸豆腐腸粉魷魚碗仔翅等等等等 跟住就過咗銅鑼灣新瀛宫按摩 地方比我想像中好 第一次俾人踩背同擦背 其實整個流程係 首先去 Locker 換衫 跟住只係圍住條大毛巾 去沖涼 其實好唔慣赤裸裸咁喺其他人面前行嚟行去 跟住焗咗陣桑拿 浸咗一陣大池 去咗個休息室坐咗一陣 飲咗杯茶 但係冇食嘢 跟住就去按摩 按完摩再沖涼 擦背 跟住再沖身然後就換衫走喇 湯米沖刮痧 成個背脊都紅晒 之後湯米成個人都吽晒 好慘哦 去咗大良八記食完糖水就返屋企喇
今日遲咗少少起身 好趕呀 但係都趕到搭八點零五分嗰班車 今日 Phoebe 放假 Terence 又請咗 Sick Leave 所以今日好靜 Shanice 拎咗樂嘉同藍罐曲奇返嚟 又食咗好多嘢 但係好彩我唔食樂嘉 如果唔係今日又飽死 Lunch 去咗見個新保險 Agent 真係俾佢激死 約佢十二點半喺麥記等 點知佢打嚟話唔知點行嚟 諗住約番佢去 Pacific Coffee 點知佢又話之前冇搵過間 Pacific Coffee 喺邊 搞到我要行過去金鐘個巴士站等佢 點知原來佢唔係喺去灣仔方向嗰個巴士站 搞到我又要過番去對面個巴士站 終於搵到佢喇 問佢去邊度傾 佢話只係識去金鐘近中環間 Delifrance 我話我公司係近灣仔 點都估唔到佢話去番 PP3 嗰邊傾 搞到我行嚟行去 頂 點解好似要我呢個客去就佢嘅？？？ 其實聽佢講份保單啲嘢 佢係講得好過 Winnie 嘅 清楚明白好多 臨傾完嗰陣佢話佢係一個基督徒 唔會慶祝生日同所有中國節日 同我講話佢唔會寄生日咭同賀年咭俾我 佢都幾搞笑架喎 之後我亦都好坦白同佢講話我係唔鐘意女仔嘅 所以做 Financial Planning 時唔使做啲乜乜仔女要用幾多百萬啲 Saving 佢聽到之後成塊面都紅晒 好似好驚奇咁 哈哈 嚇親佢添 放工食咗啲嘢就返學 勁眼瞓呀 好難先捱到落堂 一上巴士已經瞓著咗喇 返到屋企大佬又啱啱先沖涼 我超眼瞓 所以我等唔到沖涼就去瞓咗 大昏迷
