今日同樣是風平浪靜，公司呢幾日都係處於電話大戰，理由好簡單，尖沙嘴既工程經常性出現不同種類既問題，例如日日打黎煩我地既吳小姐，唉!我真係覺得好離譜，簡單d黎講，日日係咁打黎，你唔煩我地都覺得煩，咁講真你覺得我地做得唔好，你都要比條生路我地行下，大姐諗計處理做野都要時間思考同埋安排，你估我地係超人咩?

好啦!作為全公司最細個個，我可以咁講jimmy師傅今日冇係公司，herbie亦都半路出發，我可以咁講公司今日冇咩人，我好悶!

herbie其實係幾唔滿意波叔既運作，好簡單既係，今日臨食飯之前都要搞一大輪野，結果我同herbie都好遲食野，仲要係我就一就herbie，我局住都同佢食老麥!難得呢個同事有情有義，我覺得同佢一齊食飯真係壓力全消...

咁佢今日同我係老麥食野之際，佢都讚我，雖然我學野學得唔好，但係勝在一份熱誠，佢係咁依都比90分我，我都好開心!講真唔係好多人咁樣對我有一份欣賞既睇法，講真讀書不成又比人覺得冇出色，喜歡打架或者武術又比人覺得我係爛仔(事實上我曾經做過)

herbie讚我，唔代表老闆波叔睇法同樣，我會咁睇既，老闆總係想員工能夠獨立面對工作上大小問題，但係我今日都未學得哂d野，咁我又點會比到一個肯定既感覺人地呢?我明白電話呢家野講真真係學極都仲有，邊有完結既一日ga?始終係一件科技既產品，假若我好幸運到退休前一日仲係做緊呢一行，我諗我d工作上既筆記，可能有黃頁咁厚!

好簡單咁講啦!老闆從來只會希望員工能夠「做到野」，「做到野」既意思，冇一個定義，每個老闆都可能唔同，有d老闆(好似鴻利茶餐廳既林生)，佢會覺得做到指定動作，唔好搞亂攤子影響生意就可以)，而波叔比我感覺係做到指定動作，而且要有積極進修既心態，唔好搞亂攤子，更要學識尊重客人。

對於我黎講，波叔心目中既要求，其實我會覺得好難符合佢既原則，指定動作=我要學既系統技術，我可以講我連控制一個內線電話都覺得好難，講真要記feature記code，我覺得一d都唔簡單!同埋我覺得學得好吃力，第一我冇咩點讀過電學，就算ive個時有讀既，我又點會識咁多?講真ive講極都係一般既單相13A，三相32A既野，我係完全冇接觸直至我做GCS，咁好啦!跟jimmy學野，我冇底子既，又學唔識，唉!人地就以為我學極都唔識，其實我係需要d時間去組織!最慘既係人地會覺得我成日聽人地講野聽一半，唉!我都唔想，呢個係我個人既short term memory好差，所以我總來背默都好易肥，食蛋既次數不在話下啦!

講真冇人明白自己既難處，一般人只係會覺得我好蠢，但係唔會有人明白，人人都有唔同既地方，我只係比其他人學野慢d，但唔代表我完全學唔識!一覺得蠢就罵，其實我覺得好無奈，我該當何罪?學野慢，吸收力差，但係就已經將我入罪，罪名係蠢，咁同「莫需有」有d咩分別?