昨晚，我收到一位朋友既SMS同來電(當時人係邊個我唔開名啦，亦都係我唔想太多人介入人地既家事)，唉!呢個問題家庭，最終都係爆出個大頭佛...

咁我呢個朋友就話近排佢老豆又被老娘發現出面有第三者，而且係老娘睇完個手機之後，情緒波動好大...

我朋友既既阿媽本身既CASE係咁既，佢阿媽係國內新移民，嫁入黎香港呢個佬呢亦都係...個佬離婚再娶。不過就係話，呢個佬失去一次婚姻都仲未知道死未點寫，亦都係比我朋友及其阿媽知道左，佢依然身邊都有纏繞不清「紅顏知己」。

對上一次，佢阿媽發現老豆返大陸做野，有問題出現左，結果...出現左呢個經濟封鎖，咁老豆亦都有認自己出面出現左「偷跳」既問題，亦交出自己既經濟來源比阿媽。事隔一段時間，阿爸公司出現左問題，多間分店都清盤結業，住既私人樓都變成唐樓上到頂無升降機，屋企亦都淪陷成為一個不愉快家庭...

無錢、債務問題未清、住由好變差、一家之主失業、阿媽要直踩變成主要收入來源、阿仔要返學讀書要錢、工作壓力大...重重打擊住呢個阿媽，亦都變得情緒出現左問題!

我老友想玩單車，個老豆話OK，老母死都唔OK，原來係無原因既，因為個阿媽原來都已經諗野諗到好偏激，借口係驚個仔出事...我覺得唔係咁簡單囉...國內好多人因為一孩政策既制度下生活，變得好緊張個細路既成長同發展，拆開少少黎講...我同事係國內有頭家，個仔今年已經14歲了，即大約國內讀書既等級係國中二，即大約好似香港中學中二，咁大個仔居然個老頭係唔比佢自己在家中煮飯?我諗好多一般港人係呢個成長階段，肯入廚房幫阿媽手煮返兩味既，都應該最低B煮到個飯，煮到一個簡單既送!呢D咪就係現今父母對子女既溺愛...由其國內，點解會有癡肥童?簡單咁講就係家陣個d富二代根本係屋企就要風得風要雨...又唔洗做!

咁事情發展到呢個地步，應該大家都會諗到個老母點解會咁...即就算個老豆唔生性走佬，阿媽都起碼有個仔做寄托!

到近日老豆又被踢爆手機sms又有「紅顏知己」，即刻屋企又開始第三次世界大戰!(我個傻朋友仲寄望老豆會為佢帶來一部大車，家陣又出現泥菩薩過江，睇黎呢次佢又要失望)

到尋晚，我朋友屋企上哂差佬，點解呢?阿媽係飲到大哂，而且走上天台求死，明顯地今次已經唔係第一次，其實對上家中有野嘈都有過去既上天台企跳事件，唉!玩到咁為乜呢?

講下我自己，其實我老母都有呢個情況，我老母都有係屋企既紛爭入面為求要我老豆達成共識，結果係我媽走去以前我住上水警宿既「騎樓」企跳，結果就搞到勞師動眾，我姑媽、大表哥之類個D就上黎「救人」...

我有下列意見:

1. 我朋友應該做既就係將天台門鎖上，避免再一次比阿媽因何事而走上天台，講真走得上天台，已經發生好多可能既危險，為左避免再發生同類事件，將天台關上...

2. 個老豆一次又一次咁離婚、有外遇、有「紅顏知己」、偷跳偷食...完全唔見個責任感係邊!呢個人都失信既，我亦都覺我朋友既老豆係一個大肚腩賴皮三，無口齒兼好識「射波」...呢D撚樣人人都要插佢兩鑊，而且據我朋友所講，呢個人次次同太太嘈交，次次都係無喧交下火既情況，次次都係一走了之!(同我老豆一樣，我老媽要反轉向佢道歉才成事)

3. 阿媽搞到咁，不如去小欖睇下醫生，再咁搞呢真係會帶比人好多麻煩，亦都係唔好事事都搶得緊，咩事都有解決...工作壓力大，辭去那工作再找另一份(據我朋友說該公司都有出現同事做到精神錯亂同佢阿媽情況近似)

4. 一哭、二鬧、三上吊對眾多男人都可能有效，但對一向做開玩家既人士，又邊到有效...有一句說話叫做「妻死妻還在，下個更可愛」 ，既然呢個人有離婚記錄，亦有現時既偷跳，你認為佢仲會唔會珍惜今天既屋企?所以我覺得呢位太太做呢樣事呢...太天真!

總結，我唔想做帛金...