老友們，如果你地係當時同我讀同一間中學，又同我玩得埋既，應該都知道我曾經係長跑隊隊員，與此同時，我都係跑當中識到一位女同學，就係陳應霞(Ivy)，當時都幾開心啦!識同佢呢個知音人，亦都有好多身同感受既感覺!

不過呢段感情呢可以話係冇名份既浪漫，唉!講真佢唔係差，而且對人真係好好，我唔明白點解佢會係禮記會受同班中既同學排斥又或者係比人整到喊，當然我亦都好同情佢既遭遇，更加係對佢唔好既人有好多不滿，因為我覺得人人都係平等，點解佢要受到呢d咁唔好既待遇?自問當時又唔知點幫佢，我可以咁講，遠望佢比人蝦，但係束手無策...

自從大家分開左，我亦都畢業之後，我好記得我最後一次見佢，係佢係上年我返禮記既樂行去玩，之後我就見到佢去長跑既training...的確佢比以前更消瘦!可能係種種壓力之下，佢挨得太辛苦啦!

之後我就同佢之間音訊全無，直至有一日藍莓(青蛙d朋友，ivy既同班同學)，佢問到人幫我搵到佢既消息，同埋聯絡方法!原來佢已經冇再係禮賢會讀書，我心諗當時我識佢係中三，我讀ive個時係中四，點解...佢唔再讀落去?藍莓報稱ivy覺得佢覺得讀書壓力好大，之後退左學啦!唉!讀書邊到冇壓力呢?你有我有係香港返緊學個d都有!

咁我亦得到ivy既msn，當然就啦啦聲開turbo add人啦!話哂咁耐冇聯絡，都想知下佢既近況，可惜第一日佢冇online，第二msn有佢既資料更新左，原來佢都處於快樂既甜蜜當中，亦發現佢已經冇再係粉嶺住。我覺得對佢黎講係一件好事，我好記得佢當日同我講，屋企係真係亂七八糟，大哥唔努力工作，二哥又去就圍蒲，同樣唔努力工作，不務正業!另外就屋企資源唔好，有電腦但冇上網，對於佢學習都係一大困難!屋企對佢黎講唔係一件開心地!

佢離開兩個傷心地，一個係屋企，一個係學校，而且而家仲係蜜運當中，我都替ivy高興，換著今日既我，我都想離開屋企，轉換工作，而且有拖拍，講真「零食開眉粥，莫食愁眉飯」!

不過我今日見到佢係msn on左line，而且我見到佢同佢男友既合照，似乎真係好開心!見到佢既近照，面色比以前好得多!我hi佢，佢好似唔記得左我係邊個咁，唉也陳小姐，有相你睇都唔認唔出?(或者幅相真係唔係影得太好啦!)

希望佢可以開心d，以前同佢玩埋一齊，唉!日日都愁眉不展，有時係喊既，我覺得ivy真係辛苦命!我好同情佢，但我幫唔到佢!呢個亦都係成為左我人生又一個遺憾...