尋日我就提及到我阿頭放我係座頭，咁座頭其實工作係好簡單，巡樓同坐。

咁一日巡樓兩次，其實都唔係累，都係算係幾好啦!不過真係要好小心，因為一個唔留神，有可能會行錯位打錯鐘!其實打錯鐘事少，打少鐘事大，咁今日我就好安然渡過!

一口氣打80個point，真係要好集中精神!今日我都做下d偷雞野，一路巡樓一路抽下煙，爽!不過呢d係當然要留係安全時間，即係好少人既時間，咁就唔會比客見到投訴!

係朝早既時候有個阿婆讚我，佢先頭就問我累唔累ar?我就話唔累(其實都有d累既，返工邊有唔累?)咁阿婆就話:「你呢個後生仔，唔怕辛苦，又唔介意工作既性質，我都覺得你父母有你呢個仔都好安慰!」

不過我屋企人其實都唔太同意我做呢一行，其實我唔覺得...講真呢一行其實冇分話後生做定老野做，有時候呢行係需要責任感、體力、思維清楚、情緒控制(冇EQ係做唔到)...一般人只係睇到保安既表面，但背後保安做左好多野，而人係唔理解!試諗下當係係床上倒頭大睡，保安又做緊咩?

仲有既係，呢一行開始年輕化，以前就話係阿叔阿伯做，咁而家我咪又係做得好好睇...