尋晚，我係明珠開工，有冷氣唔錯啦!講真嘉盛太熱啦!

咁尋晚同小塋MSN左一段時間，我地講起一個話題係關於補習，唉!其實香港好多父母好依賴補習，有時候我覺得父母係想懶可以少D小時間湊仔女，夾硬送佢地去D補習社，其實補習我覺得係好哂錢!根本讀唔讀得成書係睇你個人肯唔肯讀，同埋講緊你既慧根去到邊到...

好老實講，我以前細個小學至中二都有補習，但係對我黎講其實係一D用都無，講真我既學習能力我知道自己係比一般人弱同慢，可以話係「學習障礙」，你叫我背默中文課文，我可以話死比你睇，我係可以尋晚背到滾瓜爛熟，第二日返學上場默書既時候，我可以一D記憶都冇，呢個係我人生之中最痛苦既事，無奈到今日無人能夠了解我呢個問題!

背默失敗，即係返到屋企加料做多樣功課係罰抄課文一次，小學小三個時我全年既背默係"全蛋"，當時我好記得我係串到係阿SIR陳耀邦宣佈今次默書成績既時候，佢係講:「今次默書陳小明同學100分!」大家拍爛手掌，之後阿sir再講:「但係有一位同學唔合格...」呢個時侯我通常都會打斷阿sir既說話，我講:「咪又係我囉!」

咁係呀，我覺得背默對我黎講係極之不公平，我有學習障礙，你條契弟就係咁叫我罰炒，結果呢我係選擇性咁交白卷，大不了咪唔默囉，講真你要係到屈我機我真係唔知點做!不過天公造美，從中練成左我係可以抄寫好快既人!呢個亦都係中學嚇壞成班同學，當時miss黃慧敏(又比人叫黃老吉)問我課文既野，我都係個句，尋晚睇到滾瓜爛熟，今日失憶...結果我係選擇"罷答"，都係個句對我唔公平既，我為何要參與呢?

結果我都係強迫性底下我係被罰炒，呢課書係"再別康橋"，都幾係野架對於全班同學，但對我黎講碎料啦!以前小學練成既武功，今日大派用場，結果我短短一晚3個鐘時間，我炒哂!第二日交貨，嚇死成班!

我覺得好自豪架，講真你夠唔夠薑好似我咁?你肯定會話(有幾個答案)，如下:

1. 幾大我都答下問題，唔洗抄到手斷wo!(你就得姐，我就真係做唔到，講真如果我記到野既話，我諗我係比很多更聰明)

2. 大不了罰抄都唔交囉!(你覺得可以挑戰黃老吉既話，不妨試試...通常你比佢玩到7點先收工)

3. 挑!無人叫你交做料架嘛，偷工減料，實情黎個「短加長減」...(你認為黃老吉唔會仆街到一粒一粒字數你既，我比個人頭你入樽)

4. 請幾日病假，比自己休息下鬆弛神經，返到黎佢都唔記得啦!(你諗得黃老吉太小兒科啦!佢有驚人既記憶能力，你拖佢d功課，或者有d罰既野未找數，佢係歷歷在目，好野過d電腦)

以上四個逃避既方法我係中一已經有1,2,3挑戰過，4未用過，但有同學實驗過，4個都失敗而回!你諗到第五個方法，好可能係退學或者係曠課，呢個我都覺得係好方法，忍受唔到黃老吉既教學，不如你乾脆走得灑脫d!

唉!講到離哂題，明明係補習講左自己d罰抄威水史!以前小學補習去第一間補習社，根本都唔係學野既，只係得個大波妹係到同d友仔係到吹水，食哈迪斯(家陣呢間野全港性執左)!

第二間，我覺得好鬼變態，間野成日開冷氣開到好鬼凍，嘩!真係凍到手腳薑硬!遲到又要木尺打手，癡線!家陣呢間野真係唔識得分邊個係客，邊個係主人家!我係客，幫襯你仲要比你打?你都癡線既!第二日我即刻唔返補習社!

之後屋企人知道我補習社，選擇上門補!第一個女人黎既，成日都講埋d白癡野，我心諗你低能不如唔好浪費我時間啦!

第二個同第三個係以前教會識落個d哥哥，有用心既!不過好快就冇補我，可能忍爆我既學習能力!

第四個係一個要上人地門補既，我仲好記得佢叫李太!超惡...搞到我都係成日打過去佢電話話唔返!但係佢救左我小學升中試個關，冇佢我入硬上官級數或以下...

最後係教會d姐姐黎既，不過補極都無咩起色，索性之後我同屋企人講以後都唔補習，我對自己係學業上作出最大既放棄，講真我學習能力咁弱，屋企比幾多錢都好，都唔會改變到我呢個慘痛既情況，你地個個背書都背到，做數學題目無問題，但點解我要面對呢d野?

講真我既數學係差到無人能夠接受，例如茶餐廳埋單個張紙寫左d價錢，我要諗成半個鐘先計到要比幾多錢!我諗我既數學程度大概係小五!我覺得數學係好難，唔係我唔面對，而係我無咁既能力去完成數學既題目，「十室九空」既考試卷通常係我既傑作。

所以你唔好叫我背書或記野，或者叫我計數，我諗我嬲到你飛起，亦最憎d數學叻既人挑釁我!