早個排我岩岩架單車作品終於都完成左，架車亦成為左好多吐露港人士既注目禮，無奈因為香港對TT既認識好少，我都覺得香港既車店應該嘗試一下引入多點有關TT既用品或零件，供一D玩家去購買，話時話我整呢SET野都用左成萬蚊，當中亦有好多困難啦!例如有D件買唔到要訂，又或者有D件要等...
到左近排，我見我細佬整佢個架車無乜起色，作為阿哥既我，我都唔會見死不救既，始終呢個係我細佬，無理由自己玩得爽而細佬就獨自面對架改到唔拖唔水既車係到遊，咁好無引既!所以尋日黃昏既時間，我同佢去左大埔搵件，主要就搵頭盔、燈同埋咪標。
我細佬其實一直都無戴過單車頭盔，咁亦都係我同我細佬係小輪徑黎講算係快個類，即係如果大家係吐露見到有好多人都係碌車，碌車即係慢慢行既意思，咁對於我同我細佬黎講其實無乜野感覺，相反地如果玩到40幾50km/h我地當然好開心啦!始終快好多，但問題在於我地玩得快，其實同時亦都要注意人身安全，當然要自保既首先就一定要頭盔。
咁額外有d話題想講既係，我係工作地方有兩位兄弟玩java既相熟住客，即係阿峰同埋阿權，據我同事徐大哥報稱，阿權於星期五晚炒車，徐哥話阿權玩到爆哂缸...呢個好明顯就係佢地兩兄弟飛車，亦都係無戴頭盔既後果，咁我亦都試過啦!希望阿權快d好返啦!
講返正題啦!頭盔係單車界黎講其實GIRO同BELL都係老大哥，點解咁講呢?GIRO一間法國單車頭盔專門既大公司，係環法及全球大量職業同其他單車玩家都會考慮使用，因為基於佢既質量，同埋安全性高既理由，大把人都買啦!BELL更加唔洗講，呢間公司係由設計、生產各種行業需要用既頭盔及身體保護器材，係一間美國既大公司，咁呢間後黎見到市場就係愈黎愈多人玩單車，咁不如打鐵趁火打熱做返單車頭盔啦!又比佢殺出一條血路...所以時至今日，每間大間既單車店賣頭盔都係基本見到GIRO或者BELL。
咁我地選擇去最多頭盔買到既地方就係大埔登山者，咁我其實之前係無去過，因為我唔多知大埔有呢間野，但一入到，呢間野玩既裝備都拍得住振揚既級數!我打趣一問有冇TT水滴盔，真係有wo!咁佢有兩頂，一頂就藍色，一頂就紅色，兩頂都係GIRO既ADVENTURE2，之後再睇價錢...$1100，唔洗諗啦!試下岩唔岩先...得WO!好舒服，法國佬做野真係唔簡單...千一蚊有頂好野，即買啦!
之後到我細佬個筆，佢就想要RB公路車盔，咁我細佬對我之前個頂SPECIALIZED AIR force3無咩好感...原因係佢戴唔到，頭骨形狀夾唔到...咁佢又係喜歡giro既，本來佢就想話平平地算啦，佢唔想我用咁多錢...但我就覺得好盔難求，頭盔其實就唔係睇價做人既，係基於夾唔夾到個頭，同埋你覺得舒唔舒服為重點!咁本來我都想送比佢一頂係GIRO LIVE STRONG版既IONES頭盔，但細佬其實需要係L碼，佢最後搵到既係GIRO SAROS唇膏紅色既頭盔，盛惠800蚊。
其實如果係GIRO黎講，基本上你係16歲之前或者你係一個細粒既人(約150cm或以下)通常都係S碼，但如果你係好似16歲後既或有155打上到啦...通常要大碼先至岩。相反地specialized倒返轉，可能佢要迎合哂全球各國既人既size，如果你係成人頭骨係谷起d，圓滿既，係adult small，如果係女性係多數要搵woman版本，不過adult small通常都岩戴，不過如果你係giro要L碼既...SPECIALIZED就多數都未必岩碼。
尋日再去東京，又見到老闆...佢依然都係一個好友善好好笑容既老人家，我叫我細佬睇佢個到D件，我細佬都驚訝D SHIMANO件可以平成咁，屌!你估好似上水粉嶺咩...好多時都抬高左個價!平個D鬥平，貴個D又唔見到平WO!
咁我細佬就係呢到買左隻咪標，同埋一粒奶嘴燈，仲要有折頭!頂，死人振揚無平到比我...
到左尋晚，北海道小隊基於臭軒要準備排球比賽既關係，所以尋日佢無出席啦!出車之際我覺得安全感大左，可能細佬有頂頭盔啦!我用TT盔，一試之下真係好破風!咁尋日就去沙田方向之際，我地見到創新路有一班係小朋友(大概係小五至成人級數)，佢地係創新路玩，咁我地係借路出孖橋個邊，順手睇下佢地咩料子，咁個班人其實都唔弱雞，有D係bianchi cycling club既成員，有d係有錢仔父母買左架好既RB比個仔，有D係真係幾叻既小朋友，咁最搞笑都係一個小朋友見到我係有TT野，佢大呼:「嘩!TT...勁AR!」不過我唔知阿然係比我地扯到爆計定係塞人塞車突圍唔到，佢係創新路好慢，其實佢既級數係同個班小朋友既高少少，唔緊要!佢慢慢踩踩下就會曉飛架啦!我同我細佬係44KM/H幾快既位置，真係好爽!出奇地我細佬死跟又MATCH到，佢係食尾既。
之後再去到沙田圍天湖食糖水，無意中見到兩個好得意既孖妹，大概係2至3歲到，好靚女下架!家姐似日本妹，細妹似外國妹，如果佢地保養得宜，大個左相信係好靚女....咁家姐就唔怕羞，成日走過黎同我地玩，我細佬最搞笑搵個頭盔笠孖妹個頭，孖妹一見到咁樣走夾唔頭，好搞笑!
最後我地係創新路做模擬夾車，咁內容唔講啦始終夾法係我地內部機密。其實尋晚係我地夾得幾好既一次，不過阿然體力始終差少少，我都覺得佢需要好多時間去練，但係唔係借山路咁樣練呢我未肯定到...不過有朝一日，我知道阿然係會快到好誇張，即我預測既感覺係知道用根力好善長既人，佢既爆炸力無乜或者唔大，但係佢既維持速度既能力其實係好強!
呢日玩得好開心，亦都買到心頭好...
|
