16號同17號，北海道小隊將慣常星期五或六或日既單車玩樂，改成行山、露營...打破以往沉寂的活動!

講一講額外的事，平時踩單車，新界人士大不了都是往常地玩車就會去大美督、吐露港呢兩個地方，車隊練車就會係創新路，平時踩就會行吐露港海皮線，孖橋係一個吹水點，馬鞍山海傍徑碌車(快唔到)，其實生活日日如事，都幾悶下...其實我地小隊4個人，都唔想好似一般既車隊咁樣，只係主要講機械化既繞圈活動、速度、同其他隊伍比較...其實都無咩意義!我地希望做到既係有唔同既活動調節，同樣得到練習既效果。

咁16號既之前，即係8號星期五，咁我地往常踩車活動，但我提出了16及17號我放假有雙日，亦提出左行山既活動，講到明係玩露營!開頭我都諗唔知d隊員會唔會頂唔順或者係覺得行山好悶姐...踩單車睇下d人點踩，有咩靚車睇下開心下，成班挑下車，咪仲好?出乎我意料之外，全部一致通過...臭軒返而話:「平時踩單車咁踩好悶，亦都好耐無行山...」細佬更瘋狂既想法，踩車殺埋露營，我只可以話呢種方式唔係唔得，你有架MTB會比較理想，但係香港較多露營點唔可以單車入埋去，所以要衡量兩全其美既方式係香港唔多可行。

呢個行山加露營活動，其實對踩車方面都有好大幫助，咁對於默契方面都有好大幫助，即係大家對個團體運作都好大轉變，例如自己自動分工、有條理計劃、團結、了解自己體能、有進步提升、有活躍既歡樂聲...

由事前準備，大家買野準備行程都處於主動，咁例如係阿然本身個人係比較缺自信心，即係比我既感覺係，下下都係問左人好唔好先做野，比較少自己判斷再出發行事，但係佢係超市買野已經少左好多呢個情況，佢係可以介紹過自己覺得喜歡食既野，例如soya梅酒。咁大家亦都有自己帶一d自己喜歡既野食去share，呢個係見證到個團體進步，同埋有自己獨立思考及團體思考既運作模式。

題外話，團體其實可以分成幾類，呢個係我自己比名。君主運作: 一個主導者，帶領其餘既團員處事，而且團員按自己崗位做事就可以。多功能「組長」: 個個都係「組長」，當整體運作出現邊個係呢方面係專材，即刻成組長。平民制: 每個都唔係組長，每個都係有自己崗位，經驗較多者處理的事比較多，經驗較少者亦是要控制崗位以外的事。我個人比較喜歡平民制，因為公平性較高，經驗多者處理的事較多，是應份的，亦都是經驗少既係可以支持或者是反對組織內決定的事，當然呢個方式係有好有壞，係團員係可以自發性去想或做出對組織內好處既事，壞處是團員如果不是積極處事，換來是有可能一盤散沙。而「組長」制我覺得會是做死某一個，即係有時分工既情況可能某一個工序好麻煩，雖然你係呢方面專才，但其他人協助唔到你，其實係辛苦。君主運作，其實唔係唔好，對於一個主導者係很好，基本上佢係唔洗做，可能只係一個控制及監督，團員好smart既基上好輕鬆，但團員可能handle唔到，只能依賴其他團員協助，亦會有團內你玩我我玩你既情況，又或者個d「篤背者」同埋「拜權者」既出現。我地團內既生活文化都係運用平民制既concept，即係冇最大冇最細，冇當權者，亦都係有自己崗位同埋互補既能力，呢個亦都係我最喜歡既情況...有問題提出，做唔到即刻講，唔正確有錯既即刻認真處理，有能者立即企出黎幫大家，缺能者亦都樂意跟上進度或者唔跟唔會拖累進度，再由另一方面再協助團體。

今次我地行山係行環萬宜水庫，咁路線係我plan既，由於我係行山方面經驗係最多，所以我都間接做埋活動planner，我細佬就做開處理糧食既，咁都係由佢handle返，佢亦都好主動著手諗糧食既問題，臭軒體能唔錯，佢亦都好樂意協助整體團既運作，例如我一開聲要協助，佢都即到即做。阿然就處理水既運作，其實新手黎講，佢都算係唔錯。

咁我地16號黃昏時間開始行，咁由於冬天既關係，日短夜長，我地去到北潭涌都已經要開哂燈，咁我講左個d活動流程同埋需知，亦都做下熱身，以往係樂行之友，miss chu話事帶行山都好少話做熱身，其實我知道運動每一種都係一樣，唔做熱身或者暖身，發生意外既機會率係比做左既多好多，咁第一情況就係天氣咁凍，唔做暖身，其實係好凍，亦都係第二有新手阿然，佢有可能唔適應，會好易整親。

之後一路行，好黑既西貢仲要係無街燈情況，我地都採取行得緊d，咁因為行得近，可以拉近大家既距離，安全嘛!亦都係我見到好多行山人士都唔係好注意安全，即係帶太少行山裝備，其實我覺得係一個無咩補級既情況地方，你唔帶電筒，冇行山仗，就咁一個袋少少水，都幾危險。

一路上，我地都係有講有笑，其實基本上都係學校事，傻仔個d趣閒，都幾好笑既。亦都係成日用手機煲lady gaga既歌...一路行，我地亦都有一度熄燈夜行，見到成天都係星既晚空，其實城市裡邊到有呢d咁好既晚景?

浪茄營地當日都係大熱門露營地點，我地係獨孤山一帶山頭都數緊營數既燈火數目估計入面有幾多人，我同細佬點解判斷呢個情況?第一個係要計位紮起個營同活動空間。我地行山，運作上係要睇好多細節，起初我都擔心好多人入左去玩搞到好難佔據理想既位置，例如露營最好有個石台石桌，又或者係有燒烤爐，咁凍既可以起火取暖，又或者有一個防禦野生動物攻擊既情況。

去到浪茄營地，我地開始起營煮食，起營就我起得都幾困難，因為大風既關係，我同臭軒都要起得好快同埋要計返風向，大風有可能營都吹走，我個人起營經驗之中，由外展到今次露營，我都未用過營繩，今次終於有機會用，咁營繩係拉起個營個外幕，減少個營入水既機會。

另外呢，因為天氣凍，咁有個火取暖都係比較好既，好多人都有撿起一d大木頭同柴枝燒，呢個亦都係我露營經驗之中第一次玩呢味野。亦都係我地四個食下麵，有d日清美味寶，亦有d午餐肉...

之後由於有營火既關係，我地成日搞果個火，乜都攞黎燒，好搞笑既阿然無啦啦捉到隻蟹，當然又係攞黎殘酷既對待啦!

最正豆既環節都係飲酒，我同細佬都係喜歡飲烈酒，我同細佬一齊飲43%GIN酒，烈酒有一樣野好，係寒冬一口到肚，即時有暖既感覺，好爽!當然呢D野間唔中飲下就好啦，長期飲好傷身。咁阿然同臭軒飲甜酒，即係個SOYA梅酒，但係我對呢D酒冇咩興趣，因為飲落冇咩感覺，而且換著咁既酒，我寧可飲啤酒。我亦都有玩噴火，一口飲少少酒，向營火大噴，即時好大火，好爽!阿然唔明個道理，佢嘗試向個火噴梅酒，結果係無料到!其實原因好簡單，酒精濃度唔同，GIN係43%，梅酒得個10幾%鬆D，咁當然係酒精濃度高既好燒啦!

到第二日，我地收拾好D野，就上西灣山，我講到明西灣山係難既山，因為咩住好多裝備既情況，其實體力不停既消耗，都幾累架!開頭我都驚阿然爆計頂唔順，出乎意料之外，阿然挨過了，亦都係頭位行得唔錯。

最後我地係西灣路，即萬宜水庫個d路見到有香港田徑會搞比賽馬拉松42公里，我地見到有個阿叔好跑得，咁我地都一齊跟住跑，支持佢!好開心ar!佢最後羸左比賽架!

成個行程真係好開心，亦都見證到每個人既進步同挑戰向上既心，臭軒同細佬都無令我失望，因為當年樂行之友，佢地兩個都係我既副主席，同埋係我地樂行之友之前d高層有份訓練出黎既人材，講真如果我、細佬同臭軒係行程中失手，真係好丟架，幸好都冇丟到。