尋晚係山翠開工，唉!好多野要應付咁...

第一係，明珠個邊麥sir同劉大哥係到尋找緊後巷垃圾房匙...唉!真係激死...講真垃圾房匙係巡邏匙成串好似攞你命3千既放法，如果我係整唔見，佢地應該成抽都搵唔到!但佢地話只係一條唔見，咁點會有可能咁大鑊?

第二係，尋晚出事了，我開工期間唔舒服，有少少頭痛，咁諗住坐埋一邊抖抖，點知抖抖下訓左，再彈返起身個時，電話來啦!

電話中人:「我係總所報更主任，麻煩你打返去報更系統報返更...」我:「係...係...唔好意思!」

個一刻...我就諗...大鑊啦!工作上驚動到一d上司上級，係一件好麻煩既事，講真家陣我都未知點拆，只好今晚同阿頭講衰左，睇下佢點教我寫一份「自己都唔敢相信」既報告...

點解話「自己都唔敢相信」，理由好簡單，如果我照直腸直肚去寫:「我不小心睡著了...」咁我肯定收得工!我諗只好咁寫:「因為身體不適肚痛，要到廁所解決，完事後錯過了報更時間」咁睇落都有d同情分既，因為肚痛去廁所，咁無理由拖埋個電話入廁所!

有人可能會問，咁小拔你可以用手機架嘛?係得就唔洗咁講啦!我地呢行如果係用電子報更，係set死哂d電話number，即係你用手機打入去，結果只會係報更主任同你傾計，報唔到更，如果你用公司指定報更電話，咁就電腦人同你傾計...

家陣真係睇下點收科...