一直以來，聽人踩單車踩到去九龍就聽得多，咩大埔道、青山公路...搭車就試過、學車個時揸過某d路段...但係單車真係行得通嘛?Sure!有路就搞得掂，你肯踩落去就得!

尋日，我同細佬本來打算尋找一些車友，講真成日都係兩條友踩，真係有少少悶...不過無計，我地set既路段，下下都搞到d車友要「諗一諗」、「考慮下先」、「遲下覆你」之類...有時都幾沮喪，因為踩單車其實又有咩好怕?不過我知佢地怕乜，怕辛苦打長途有力去冇力返...

車友約唔成，唯有自已兩個出去踩啦!首先我地選擇有青山公路出發，其實青山公路起點係上水近彩蒲苑大迴旋處個邊，終點係長沙灣...途經哥爾夫球場、河上鄉、古洞、落馬洲、加洲花園入口、逢吉鄉、元朗市中心、屏山、洪水橋、藍地、富泰花園、屯門市中心、三聖、黃金海岸、青龍頭、大欖、深井、荃灣、葵涌，最後係荔枝角懲教所為終點...尋日我地用左大約2小時43分鐘完成左，當中包括燈位、行錯路...

咁我地行刊青山道，無意中係一間茶餐廳門外見到thomas!哈!真係估唔到!之後我地入左去飛球...我見到一位車壇既名人Vigar車隊既領班阿光...單單咁睇佢係好瘦，其實佢係個人無咩脂肪，全身肌肉化左...呢d境界，就係人地以前係港隊訓練背後所換來既代價...

係個度睇到好多貴貴貴既車，真係估唔到...好多giro頭盔...好多2萬上既車架...真係開心死呢^^

尋日係就快入飛球之前...我個seatpost水架爆左框，算啦!一場黎到飛波，殺埋入去入貨買左profile design!50蚊..細佬一路都好渴望有一個tune水樽，咁尋日都買埋啦!

之後我地係東沙島街一間好似叫百搭麵之專門店食dinner...咁個到真係好抵，20蚊湯底，揀一款麵，送一款送，咁我地當然食得既，就唔好咁少野叫多一款送...又叫左凍檸樂!每人都30蚊，唔錯!

咁我地食完野之後，我地都係商量究竟原路折返，還是上埋去大埔道?最後經過一輪討論，選擇左大埔道!咁我地開頭都怕怕大埔道個d上斜，因為都唔係少野，同埋大埔道都算係多車咁始終都係要小心為上!有幸我地好快踩哂，而且真係比原定既想法覺得大埔道係好易...

其實大埔道就咁既...由嘉頓返去就好易...去就辛苦d lor!因為始終個到都係有1:10既車路要面對，咁當然係要賣力少少先至可以完成到!最好笑都係去到石梨背，d猴子係到叫，我都估唔到夜晚d野生動物仲係到周圍走...

咁好快我地返到沙田，我地本來想話行大埔公路返元洲仔，不過誤打誤撞就行左吐露港單車徑，算啦!條條大路通羅馬，行得就算了!係吐露港單車徑，我地兩兄弟不停以慣性既夾車方式行返去，最慢都35km/h，最快就有44km/h，我就主要係協助細佬頂風，細佬就做埋尾飛彈，好快!

就咁樣，我地返到屋企...新界北、新界西、荃灣、葵涌、油尖旺、沙田行左一個大圈了...