7月11日

我第一日放假，咁平時我諗好多人都估我...你條友仔咪又係出去飛車?...哈哈，好對唔住，今次我陪老婆行頭先!

咁我老婆4點到去左apm...講真apm其實我都係有少少認識既，講真以前我做電話成日都係觀塘出沒，其實都唔算完全係觀塘，因為個邊係牛頭角多少少...因為我公司以前同jos怡和係有合作既，因為老闆波叔同師傅jimmy以前都係jos出黎既...

我去到車站同埋apm既出口，我自己就好少行去apm個邊既，因為我去觀塘都係去敬業街即係海邊既方向(個邊景物例如有投注站、駱駝漆大廈...)，老婆呢日咁著我好喜歡的，講真我覺得佢著衫唔似一般港女咁，佢有自己一套既感覺，即係我望住新之城個d我覺得好枯燥乏味。

呢日我地睇戲，係我同佢第一次睇戲，咁我地選擇左杜汶澤同黃祖藍既人生喜劇，其實我覺得都幾發人深醒，人生既灰暗，不論係職業、面對既事...其實自己係可以改變人地，令人地可以得到快樂、安慰，花多一d時間去理解人地...唔係話行死自己一套，換過來睇...其實得著最大既係自己!

呢套戲，我睇到既係老婆睇得好開心，咁我都好開心，兩個人本來係唔同既世界，但係我感覺到既係，我同佢個人係最近既...

睇完戲，老婆話要走啦，聽日仲要早返學!咁我自己就阿權有約，我同佢7點幾就say個bye就閃左啦!

返到去上水，我去左清河邨搵我細佬攞新車衫，咁我收到件車衫，我覺得28 bike既阿RICK真係GOOD JOB!因為佢代理呢間車衫公司比頤匯既GAVIN有誠意、信心、質地好好多...

呢一晚，我同阿權去左創新路練習同做一d分析性既項目，第一圈同佢做試車做一d同步化既工序，其實分別都唔係好大，不過係d彎位出入比較大，不過呢一方面唔緊要既，慢慢處理都好快搞得掂，同埋佢個部匹數細少少，咁跑出黎係有出入!

之後我亦有借車比阿權玩玩，佢話我部車幾好玩，咁梗係啦!阿權以前係3項鐵人賽既，佢玩返呢d車係容易有感情既!不過呢佢話我部車佢開到58km/h，我就覺得小輪徑家陣最快果個都開唔到咁多，58km/h平地呢d係roadbike既速度，例如係星期四科學園灰銀roadbike尾圈既速度，講真我識既港隊朋友jor神既紀錄係66km/h平地，個個車友知道呢個紀錄都嘩嘩聲!阿權應該係睇錯左咪標!

後來我自己跑左一圈之後，阿權話有兩個哥仔想過下招，咁好呀!橫掂成日操圈做倉鼠好悶，不如racing一下!不過呢兩位哥仔既能力比我想像中既距離係差，因為個賽果係我第一名，阿權第2大約加30個車位，兩位哥仔佢地一齊貼住跑既加over50個車位，有點失望!

老實講，我內心真係想搵返一d同自己能力接近既車手，講真身邊都無幾多個係可以同到自己一齊跑到，最接近既係DEVIL車隊既阿KEN，不過呢我唔係太想同DEVIL咁近!結果今日玩車都係單身走我路!

7月12日

我同細佬加埋四哥及四哥一眾既村內既車友去鹿頸，不過我覺得係好搞笑...因為我同細佬既能力同佢地相距太遠，基本上我同細佬就咁由鹿頸上山，一陣之間之嘛!就已經放到佢地無影，呢D就能力既差距，以及我同細佬一齊經曆既個人訓練，紀律就代表了這樣...

咁我同細佬分左兩站等佢地，一個係山頂汽水機，第二個係漁護站。當然我細佬係比我跑快得到，佢係山路既能力遠超於我，我到今日先至略有小成同我細佬近得多一點!兩站黎計，佢都比我快。

個班車友上山，佢地覺得好快...笑說:「家陣d靚仔傻架?」我同細佬個下真係笑左出黎，講真我地兩兄弟不嬲都覺得自己係傻架...亦都從來無覺得自己正常過。

落到大美督，我、細佬同四哥一齊出去科學園...其實如果我地兩兄弟真係唔等佢地呢，佢地同我地差距多達5分鐘，講真唔勁...不過好搞笑!

落到去科學園，第一圈同第二圈陪下四哥飛下，家上我地兩兄弟係後面係咁推尾，佢有一份幾大壓力感，但跑得都有返咁上下，比以前好好多。不過第三圈，到我同我細佬過招，咁我同佢直落以20至30個車位...佢一係平路就比我放到彈起!

亦都係，我確定左四哥加入我地車隊，我都好開心...